اۆستراليالىق بويجەتكەن ءومىرىنىڭ ءاربىر كۇنىن ەسكە تۇسىرە الادى - فوتو

استانا. قازاقپارات - ءبىرىنشى تۋعان كۇنىڭىز ەسىڭىزدە مە؟ ارينە، جوق. كوپ ادام مۇنى ەسكە تۇسىرە المايدى.

الايدا 27 جاستاعى رەبەككا شارروك ءوزىنىڭ العاشقى تۋعان كۇنىنىڭ قالاي وتكەنىن جاقسى بىلەدى. بويجەتكەن گيپەرتيمەزياعا شالدىققان. ياعني ول ءوزىنىڭ ومىرىنە قاتىستى بارلىق اقپاراتتى جادىندا ساقتايدى. (ەشتەڭەنى ۇمىتا المايتىن ادامدار. گيپەرتيمەزيا - ادامنىڭ ءوز قالاۋىنان تىس ءومىرىنىڭ ۇساق- تۇيەكتەرىنە دەيىن ەسىنە ساقتاۋ قابىلەتى، پسيحيكالىق سيندروم.)

بۇل تۋرالى bigpicture.ru باسىلىمى حابارلايدى.

الەمدە ءار كۇنىن ەسكە ءتۇسىرىپ ايتىپ بەرە الاتىن 60-80 ادام بار. عالىمدار بۇل قۇبىلىستى ءالى تولىق زەرتتەپ ۇلگەرمەدى. رەبەككا كەز كەلگەن كۇندە بولعان وقيعالاردى ايتىپ بەرە الادى. ءوزىنىڭ قانداي كيىمدە، قانداي كوڭىل- كۇيدە بولعانىن شاتاستىرمايدى.

 

«اتا-انام مەنى كولىكتىڭ الدىڭعى ورىندىعىنا وتىرعىزىپ، سۋرەتكە ءتۇسىرىپ جاتىر. بۇل يدەيا اكەمە تيەسىلى. ورىندىقتىڭ قانداي ماتەريالدان جاسالعانىنا قىزىققانىم ەسىمدە. بۇل جاستا قورشاعان ورتانى زەرتتەيتىندەي مۇمكىندىگىم بولماعان ەدى. 2014 -جىلى گازەتتەن ادامنىڭ 4 جاسىنا دەيىنگى وقيعالارىنىڭ ەسىندە بولمايتىندىعى تۋرالى ماقالانى وقىپ قالدىم. سول ساتتە اقپاراتتى وتىرىككە بالادىم»، - دەيدى رەبەككا.

 

بويجەتكەن گارري پوتتەر كىتابىنان كەز كەلگەن ءۇزىندىنى جاتقا ايتىپ بەرە الادى. ءدال قازىر ول جادىنا سۇيەنىپ اۆتوبيوگرافياسىن جازىپ جاتىر.

 

«بالا كۇنىمدە جەلدەتكىشتىڭ جانىندا تۇراتىن ويىنشىقتارعا قاتتى قىزىعاتىنمىن. العاش تۋعان كۇنىمنىڭ بولىپ جاتقانىن تۇسىنبەگەنىم راس. انام ۇستىمە ساتتەننەن تىگىلگەن كويلەك كيگىزدى. ماعان سول كۇننىڭ ەرەكشە ەكەنىن، كوپ ادامنىڭ كەلىپ مەنى قۇتتىقتايتىنىن ايتتى. ءبارىبىر ەشنارسە تۇسىنبەدىم، ءبىراق جىلاعانىمدى قويدىم. ماعان مينني ماۋس ويىنشىعىن سىيلادى. ونىڭ تۇرىنەن قورقىپ كەتتىم. سويلەي الماعاندىقتان، جىلاي بەردىم.

ءبىر جارىم جاسىمدا مەن ءتۇس كورە باستادىم. ەكىنشى تۋعان كۇنىمنەن كەيىن مەنىڭ ءسىڭىلىم دجەسسيكا دۇنيەگە كەلدى. مەن ءسىڭىلى دەگەننىڭ كىم ەكەنىن تۇسىنبەيتىنمىن. پويىز ويىنشىقپەن ويناعان ۇنايتىن. ارينە، سىڭىلىمنەن اتا- انامدى، ويىنشىقتارىمدى قىزعاندىم. الەمدەگى گيپەرتيمەستيكالىق سيندرومعا شالدىققان ادامداردىڭ بىرەۋىمىن. ۇمىتۋدى بىلمەيمىن. ءومىرىمنىڭ ءاربىر كۇنى ەسىمدە. وتكەن ومىرىمدەگى ەستەلىكتەر قايتا-قايتا كوز الدىما ورالا بەرەدى. بۇل سونداي قيىن»، - دەيدى بويجەتكەن.

 

رەبەككا ءدال قازىر ەكى زەرتتەۋ جۇمىسىنا اتسالىسىپ جاتىر. ونىڭ كومەگىمەن عالىمدار كوپتەگەن سۇراقتىڭ جاۋابىن تابۋعا نيەتتەنىپ ءجۇر.