قالدىبەك قۇرماناليەۆ: ونەرىمىزدە «جەزوكشە» سازگەرلەر كوبەيدى

استانا. قازاقپارات - بەلگىلى سازگەر قالدىبەك قۇرماناليەۆ شەتەلدەن ءان ۇرلايتىن ارىپتەستەرىن سىنادى.

بۇل تۋرالى استانا ارناسىنىڭ «ەل اۋزىندا» باعدارلاماسىندا ايتىلدى.

«ۇلى تۇلعالاردىڭ ءانى تۇگىل تاقىرىپتارى ءبىر- بىرىنىكىنە ۇقسامايدى. مىسالى، نۇرعيسا تىلەنديەۆتە اجە تۋرالى ءان بار، ال شامشىدە جوق. شامشىدە انا تۋرالى ءان بولسا، تىلەنديەۆتە كەرىسىنشە جوق»، - دەيدى قالدىبەك قۇرماناليەۆ.

ءشامشى تانۋشى بيىل تاريحي قورعا تاعى ءبىر ءان قوسىپتى. «بۇگىنگى كەشتە «ستۋدەنتتىك كەش» ءانىن ارايلىم راحىم قىزى ورىندادى. اتالعان تۋىندىنى وسى كۇنگە دەيىن ەشكىم ورىنداپ كورگەن ەمەس. ول ءبىرىنشى رەت ورىندالىپ وتىر. ال ءشامشىنىڭ ومىردەن وزىپ كەتكەنىنە 25 جىل بولدى»، -  دەيدى ول.

سازگەردىڭ ايتۋىنشا، ءشامشى ماتىنگە كوپ كوڭىل بولگەن. الايدا قازىرگى بۋىن ارىپتەستەرى تۋرالى بۇلاي دەپ جاقسى ءسوز ايتا المايدى.

«قازىر ءاندى ينتەرنەتتەن ۇرلايدى. كوبىسى تيىن- تەبەن تابۋ ماقساتىندا تويعا ارناپ جازادى. جاعدايىمدى جاساپ، كولىك مىنسەم، ءۇي سالسام دەپ ويلايدى. ءبىزدىڭ زامانداستارىمىز شەتەلدەن ءان ۇرلاپ جاتقان كەزدە «تويعا بارىپ جاعدايىن جاساپ السىن. ارتىنشا قوياتىن شىعار» دەپ ايتاتىنبىز. بۇل ءسوزىمىز بەكەر ەكەن. جاعداي، ءتىپتى، ۋشىعىپ كەتتى. ءۇستى- ۇستىنە ۇرلاي ءتۇستى. وزىنە سەنىمسىز ادامدار «بارلىعى 7 نوتا. سول سەبەپتى، اندەر ءوزارا ۇقسايدى» دەپ ءتۇرلى اڭگىمە ايتادى. قازىر ونەردە «جەزوكشە» سازگەرلەر كوبەيدى. ولار ۇيات دەگەن قاسيەتتىڭ نە ەكەنىن ۇمىتقان»، - دەيدى قالدىبەك قۇرماناليەۆ.