ەكس-پرەمەر سەرىك احمەتوۆ سوتقا اپەللياتسيالىق شاعىم ءتۇسىردى
سوتتىڭ ۇيعارىمى بويىنشا سەرىك احمەتوۆ پەن ونىڭ قاراماعىندا جۇمىس ىستەگەن بۇرىنعى ءتورت شەنەۋنىكتىڭ مەملەكەتكە كەلتىرگەن ماتەريالدىق شىعىن كولەمى 17 ميلليون 310 مىڭ تەڭگەنى قۇرايدى.
«جاۋاپ بەرۋشىلەردىڭ بارلىعىنان اپەللياتسيالىق شاعىمدار سوت كەڭسەسىنە كەلىپ ءتۇستى، ولار وندىرىسكە الىندى. تىڭداۋلار ۋاقىتى ءالى بەلگىلەنگەن جوق»، - دەپ ءمالىم ەتتى قاراعاندى وبلىستىق سوتىنان.
ەسكە سالايىق، قاراعاندى قالاسىنىڭ قازىبەك ءبي اۋداندىق سوتى قاراعاندى قالاسىنىڭ اكىمى نۇرلان اۋباكىروۆتىڭ تالابىن ءىشىنارا قاناعاتتاندىرىپ، ەكس-پرەمەر-مينيستر سەرىك احمەتوۆتەن، قاراعاندى وبلىسىنىڭ بۇرىنعى اكىمى باۋىرجان ابدىشەۆتەن، قاراعاندى قالاسىنىڭ بۇرىنعى اكىمى مەيرام سماعۇلوۆتان، قاراعاندى قالاسى اكىمىنىڭ بۇرىنعى ورىنباسارى مۇحتار ادامبەكوۆتەن جانە تۇرعىن ءۇي-كوممۋنالدىق شارۋاشىلىعى ءبولىمىنىڭ بۇرىنعى باسشىسى ايدوس جاكەنوۆتەن 17 ميلليوننان استام تەڭگەنى ءوندىرىپ الۋدى ۇكىم ەتتى.
اتالعان سوما بەس جاۋاپكەردەن ورتاق نەگىزدە ءوندىرىپ الۋعا جاتادى. نۇرلان اۋباكىروۆ ءوز تالابىندا بەس جاۋاپكەردەن 201 ميلليون 900 مىڭ تەڭگەنى مەملەكەتكە قايتارۋدى تالاپ ەتكەن بولاتىن.
ونىڭ مالىمدەۋىنشە، سەرىك احمەتوۆ قاراعاندى وبلىسىنىڭ اكىمى بولعان ۋاقىتتا جەكە كاسىپكەرلەر مەن كوممەرتسيالىق ۇيىمداردىڭ قۇقىقتارىن شەكتەۋ ماقساتىندا قۇرىلتايشىلاردىڭ ءبىرى ءوزىنىڭ ۇلى دانيار احمەتوۆ پەن ونىڭ ورىنباسارى - تۋعان اعاسى بەرىك احمەتوۆ بولىپ تابىلاتىن «ستال سينك» ج ش س- عا ارتىقشىلىقتار بەرىپ كەلگەن. ولار بىرنەشە جىلدار بويى قاراعاندى قالاسىنىڭ كوشەلەرىن جارىقتاندىراتىن باعانداردى اۋىستىرۋ بويىنشا تەندەرلەر ۇتىپ، مەملەكەتتىك تاپسىرىستىڭ نەگىزگى مولشەرىن جوعارى باعامەن وزدەرىنە الىپ وتىرعان.
سەرىك احمەتوۆكە قىلمىستى جاساۋعا قول استىنداعى ءتورت قىزمەتكەرى كومەكتەسىپ كەلگەن.
اۆتور: ميرا تولەندى قىزى
