تاياۋ ارالىقتا تەڭگە باعامى وزگە ۆاليۋتالارعا قالاي قۇبىلماق
وتكەن اپتاداعى ك ا س ە- ءنىڭ تاڭەرتەڭگى سەسسياسىنداعى كورسەتكىشتەرمەن (19 - ساۋىردە 1 دوللار 311,47 تەڭگە بولعان ەدى) سالىستىرعاندا ساراپشىلار ۇلتتىق ۆاليۋتانىڭ تومەندەۋ تەندەنسياسىن بايقاپ وتىر. ورتاشا كورسەتكىشكە سايكەس، تەڭگە 1,07 پايىزعا ارزاندادى جانە قۇنىنىڭ قۇلدىراۋى جالعاسۋ ۇستىندە. وسىعان وراي ءبىرقاتار ساراپشى تەڭگەنىڭ الداعى ۋاقىتتا قالاي قۇبىلاتىندىعىنا قاتىستى بولجام جاساعان بولاتىن.
سەبەپتەرى مەن سالدارى
وزگە ۆاليۋتالارعا قاتىستى تەڭگە باعامى مۇنايدىڭ الەمدىك باعاسىنا تاۋەلدى ەكەندىگى ايتپاسا دا تۇسىنىكتى. ەگەر تەڭگە باعامىنىڭ قۇلدىراۋى مەن شارىقتاۋىنا ساراپتاما جاساپ كورسەك، وندا مۇنداي قۇبىلۋدىڭ مۇناي باعاسىمەن بايلانىستى ەكەندىگىن بايقاۋعا بولادى. قازىرگى ۋاقىتتا دا قارا التىننىڭ قۇنى تومەندەپ بارا جاتقاندىعى بەلگىلى.
مۇناي قۇنىنىڭ قۇلدىراۋىنا ا ق ش ەنەرگەتيكا مينيسترلىگىنىڭ سوڭعى ەسەبى سەبەپ بولعانى انىق. شەتەلدىك ساراپشىلاردىڭ پايىمىنشا، ا ق ش الەمدىك ەكونوميكانىڭ تاياۋ ارالىقتا وتىن باعاسىنىڭ كوتەرىلۋىنە دەگەن ينەنىڭ ساڭىلاۋىنان دا ءۇمىت قالدىرمادى. ال بۇعان اتالعان ەسەپتە تاقتاتاس مۇنايىن ءوندىرۋ كولەمىنىڭ ارتتىرىلۋى مەن ا ق ش- تىڭ ىشكى نارىعىنداعى دايىن ءونىم كولەمىنىڭ شامادان تىس ارتىلۋى تۋرالى مالىمەتتەردىڭ تۇرتكى بولعانى انىق. ويتكەنى، ءدال وسى اقپارات تارالىسىمەن قارا التىننىڭ شەكتى باعاسى سوڭعى ايداعى ەڭ تومەنگى باعا شەگىنە دە قۇلادى. جانارماي باعاسى دا 3,6-3,8 پايىزعا ارزاندادى. باعا بەلگىلەۋدەگى مۇنداي قۇلدىراۋ سوڭعى 6 جىلدىڭ ىشىندە ەڭ جوعارعى كورسەتكىشى بولىپ تۇر.
نە كۇتەمىز؟
«الپاري» كومپانياسىنىڭ ساراپشىلارى تاياۋ بولاشاقتا تەڭگەنىڭ دوللارعا قاتىسىنا مۇناي فيۋچەرسىنىڭ باعا بەلگىلەۋى اسەر ەتەتىن بولادى. ال دۇنيەجۇزىلىك بانكتىڭ ناقتىلاي تۇسۋىنە قاراعاندا، تاياۋ ارالىقتا مۇنايدىڭ باعاسى قايتادان كوتەرىلۋى ىقتيمال. دۇنيەجۇزىلىك بانك وكىلدەرىنىڭ ايتۋىنشا، 2018 -جىلى مۇنايدىڭ 1 باررەلىنىڭ ورتاشا باعاسى 60 ا ق ش دوللارىن قۇراۋى مۇمكىن. ءبىراق، ول ءۇشىن قارا التىندى ءوندىرۋ كولەمىن قىسقارتۋ قاجەت. ال اعىمداعى جىلى الەمدىك نارىقتاعى مۇنايدىڭ ورتاشا باعاسى باررەلىنە 55 دوللاردى قۇراۋى ءتيىس. بۇل 2016 - جىلمەن سالىستىرعاندا 26 پايىزعا جوعارى.
«قازاقستاندىق ۆاليۋتا باعامىنىڭ كۇشەيۋى مۇناي باعاسىنا تاۋەلدى بولادى. ەگەر Brent ماركاسىنىڭ باررەلى 50 دوللارعا دەيىن تومەندەيتىن بولسا، وندا تۇزەتۋلەر بارىنشا ۇزاققا سوزىلىپ، 1 دوللارعا 312-314 تەڭگەگە دەيىن بولۋى مۇمكىن. ءبىراق، قازىرگى ۋاقىتتا مۇناي باعاسى تۇراقتى بولىپ وتىر ءارى باررەلىنە 55-57 دوللار دالىزىندە تۇر. سوندىقتان تەڭگەنىڭ دوللارعا قاتىستى كۇرت ارزانداۋى كۇتىلمەيدى»، - دەدى «الپاري» كومپانياسى ساراپتاما دەپارتامەنتى ديرەكتورىنىڭ ورىنباسارى ناتاليا ميلچاكوۆا.
وسى ورايدا 7 - مامىر كۇنى فرانسيادا پرەزيدەنتتىك سايلاۋدىڭ ەكىنشى كەزەڭى وتكىزىلەتىندىگىن دە ەستەن شىعارماعان ابزال. سايلاۋدا لە پەن جەڭىسكە جەتەتىن بولسا، ەۋرو ا ق ش دوللارىمەن تەڭەسىپ قالۋى مۇمكىن. ال ونىڭ ناتيجەسنىدە التىننىڭ باعا بەلگىلەۋى كوتەرىلىپ، دوللار نىعايا تۇسەدى.
ال تەڭگەنىڭ رۋبلگە قاتىستى بولجامى بۇلىڭعىر. ءبىر انىعى تەڭگەگە قاراعاندا رەسەيلىك ۆاليۋتا ءبىرشاما تۇراقتى. وسىعان وراي ماماندار رۋبلگە قاتىستى تەڭگە باعامىنىڭ ودان ءارى نىعاياتىندىعىن بولجاۋدا.
«تەڭگەنىڭ دوللارعا قاتىستى باعامى بويىنشا ءبىز 1 دوللاردىڭ 311-313 تەڭگە توڭىرەگىندە، 1 ەۋرونىڭ 338-343 تەڭگە بولاتىندىعىن كۇتۋدەمىز»، - دەپ اتاپ ءوتتى «الپاري» كومپانياسى ساراپتاما دەپارتامەنتى ديرەكتورىنىڭ ورىنباسارى ناتاليا ميلچاكوۆا.
اۆتور: مارلان جيەمباي
