ەلىمىزدە ديماش جايلى كىتاپ جارىققا شىقتى
بۇل تۋرالى اۆتوردىڭ ءوزى Facebook-تەگى پاراقشاسىندا جاريا ەتتى، دەپ حابارلايدى Stan.kz.
«مۋزىكا تۋرالى تەك مۋزىكاتانۋشىلار جازسىن دەگەن ەرەجە بار بولسا، مەن ول ەرەجەدەن كەشىرىم سۇرايمىن. ديماش جاندۇنيەمىزدەگى جانسىز قالعان دۇنيەلەرىمىزدى قوزعاپ جىبەردى. ءبىز ديماشتى تىڭداي ءجۇرىپ، ءان تىڭداۋدىڭ دا جاڭا وربيتاسىنا كوتەرىلدىك. يميدج جايلى جاق اشپاعان كەزەڭدەرىمىزدە قانشا نارسە جوعالتتىق ءوزى؟ ديماشتىڭ يميدجى جايلى جازباۋ مۇمكىن بولماي قالدى. ءبىز ءتىپتى كورەرمەن تۋرالى ءبىر اۋىز اڭگىمە ايتپاپپىز. باسقا حالىقتىڭ كورەرمەنى كورەرمەن سياقتى دا، ءبىزدىڭ قازاقتىڭ كورەرمەنى سولاردىڭ كورەرمەنىنە قول سوعۋشى سياقتى. ەندىگى جەردە ولاي بولمايدى.
زالدا وتىرعان مىنا ءسىز دە، سول زالدان شىعىپ بارا جاتقان ول دا ونەرگە قانات بىتىرگەن قۇدىرەتتەر. ديماشتىڭ ونەرىنە قول سوققان قول شاپالاعىمىزدىڭ ءۇنى كۇللى الەمدى جالت قاراتقانداي. ءبىز ءتىپتى ديماش ارقىلى ءوزىمىزدى باسقاشا سەزىنە باستادىق.
ال ديماشتىڭ ءوزى شەبەرلىگىن قالاي شىڭدادى؟ جاس تالانتتاردى قابىلەتىن سىندىرىپ الماي، شەبەرلىك شىڭىنا جەتكىزۋگە بولا ما؟ مەنىڭ «ديماش» اتتى ەسسە- كىتابىم وسى جانە باسقا دا ماسەلەلەردى قوزعادى. وي قوسىپ، پىكىر بولىسكەن ديماشتىڭ اتا- اناسى قانات پەن سۆەتلاناعا زور العىسىمدى ايتامىن. بۇل جاڭا تۋىندىم ولەڭ ەمەس، ەسسە. جوعارىدا ايتىلعان ماسەلەلەردى قوزعاعان جاڭا ستيلدەگى دۇنيە. وقيمىن دەسەڭىز - مارحاببات. تاياۋ كۇندەرى «مەلومان»، «Flip.kz» كىتاپ ساۋدا جەلىسى ارقىلى ساۋدا ورىندارىنا تۇسەدى. مۇنداي جەلىدەگى دۇكەنى جوق قالا، اۋىلدارداعى وقىرماندارىم فەيسبۋك، ينستاگرام جەلىلەرى ارقىلى جەكەگە وزىمە حابارلاسسا بولادى، كومەكشى قىزدارىم ساتۋدى ۇيىمداستىرىپ جاتىر"، - دەيدى اۆتور.
