ەلوردا تۇرعىندارىنىڭ جۇمىس كەستەسىنە وزگەرىس ەنگىزىلەدى
بۇل تۋرالى سەناتتاعى ۇكىمەت ساعاتىندا ق ر استانا قالاسى اكىمىنىڭ ءبىرىنشى ورىنباسارى سەرگەي حوروشۋن ءمالىم ەتتى، دەپ حابارلايدى قازاقپارات.
«قونايەۆ، ماڭگىلىك ەل كوشەلەرىندە كولىك كەپتەلىسىن ازايتۋ ماسەلەسىنە توقتالاتىن بولساق، بيىل ەكسپو باستالعانعا دەيىن 24 جانە 26- كوشەلەردىڭ قۇرىلىسىن اياقتايمىز، 31- كوشە سوڭىنا دەيىن اشىلادى. بۇدان بولەك، اعىمداعى جىلى ۇلى دالا ۇلكەن ماگيسترالىنىڭ قۇرىلىسىن باستادىق، بۇل جول ەكسپو اۋدانى مەن جاڭا تەمىرجول ۆوكزالى ارالىعىن قوسادى»، - دەدى حوروشۋن.
ءوز كەزەگىندە دەپۋتات راشيد احمەتوۆ سول جاعالاۋداعى ماڭگىلىك ەل، د. قونايەۆ جانە دوستىق كوشەلەرىندەگى كولىك اعىنىن دۇرىس رەتتەۋگە قاتىستى قانداي شارالار قابىلداناتىنىن سۇرادى.
«اتالعان كوشە قيىلىستارى بويىنشا ءبىز ەكى نۇسقانى پىسىقتاپ جاتىرمىز. ياعني، كولىك كەپتەلىسىن ازايتۋ ءۇشىن جول ايىرىعىن سالۋ ەسكەرىلۋدە. ەندى بۇل جول ايىرىعىن جەر ۇستىندە نەمەسە جەر استىندا سالۋدى قاراستىرۋدامىز»، - دەپ ناقتىلادى حوروشۋن.
ونىڭ سوزىنە قاراعاندا، 29- مامىردا اقىلى كولىك تۇراقتارى بويىنشا قاناتقاقتى جوبا اياسىندا 400 ورىن اشىلادى. سونىمەن قاتار قازان ايىندا قالا اۋماعىندا تاعى 9 مىڭ ورىن اقىلى تۇراققا كوشەدى.
مۇنىمەن قوسا، اكىمنىڭ ءبىرىنشى ورىنباسارى كوشەدە كولىك سانىن ازايتۋ باعىتىندا ادامدار ءۇشىن جۇمىستى باستاۋ كەستەسىن وزگەرتۋ جوسپارى ازىرلەنىپ جاتقاندىعىن اتاپ ءوتتى.
«2-3 اپتادا تۇرعىنداردىڭ بارشا ساناتتارى ءۇشىن جۇمىستى باستاۋ كەستەسىن وزگەرتۋ بويىنشا شەشىم قابىلدايمىز. اتاپ ايتقاندا، قالا تۇرعىندارى ساعات 8-9 كەزىندە ءبىر ۋاقىتتا جۇمىستارىنا شىقپاس ءۇشىن، جۇمىستىڭ باستالۋى ۋاقىتىن وزگەرتپەكپىز»، - دەپ تۇيىندە ءسوزىن ول.
