قۇراستىرمالى ويىنشىق كيىز ءۇي ساتىلىمعا شىقتى - فوتو
«Naad» برەندىنىڭ نەگىزىن قالاۋشىلار كەلەر ۇرپاققا مۇرا ەتىپ قالدىرۋ جانە كوشپەندىلەر مادەنيەتىن بۇكىل الەمگە پاش ەتۋ ماقساتىن كوزدەيتىن بۇل جوباعا ءۇش جىل بويى زەرتتەۋ جۇرگىزىپ، وسى ايدىڭ باسىندا عانا العاشقى ونىمدەرىن شىعارعان. پلاستيكتەن جاسالعان قۇراستىرمالى ويىنشىقتار MiMo دەگەن اتاۋمەن شىعارىلۋدا.
MiMo - بۇل كيىز ءۇيدىڭ 11 ەسە كىشىرەيتىلگەن نۇسقاسى. سالماعى 1 ك گ جۋىق (900 گرامم) ويىنشىق جالپى 225 ەلەمەنتتەن تۇرادى. ال، ويىنشىقتىڭ قوراپشاسى حالىقارالىق ستاندارتقا دا سايكەس كەلەدى.
«موڭعولياعا كەلگەن ءاربىر شەتەلدىك تۋريست كيىز ۇيگە كىرىپ كورگىسى، تاماشالاعىسى كەلەتىنى جاسىرىن ەمەس. ولاردى كوبىنە كيىز ءۇيدىڭ جالپى قۇرىلىسى جانە تۇرمىسقا يكەمدىلىگى قىزىقتىرادى. سول سەبەپتى ءبىز تۋريستەرگە جانە كەلەر ۇرپاققا ارناپ ويىنشىق- كونسترۋكتور قۇراستىرۋدى قولعا الدىق. ءبىزدىڭ نەگىزگى ماقساتىمىز - ويىنشىقتاردى ساتىپ پايدا تابۋ ەمەس، كوشپەندىلەر مادەنيەتىن الەمگە تانىتۋ»، - دەيدى «Naad» برەندىنىڭ نەگىزىن سالۋشى سايحانبايار.
