نازاربايەۆ ايتىسكەر اقىندارعا كوپ جاعىمپازدانا بەرمەۋگە كەڭەس بەردى
ونەر دەمەكشى، بۇگىن قازاقستان حالقى اسسسامبلەياسىنىڭ كەزەكتى وتىرىسىنا قاتىسقان پرەزيدەنت ايتىس اقىندارىنىڭ ءوزىن اسىرا ماقتايتىنىنا كوڭىلى تولعان جوق، دەپ حابارلادى ك ت ك ارناسى.
بۇدان بولەك، مەملەكەت باسشىسى ۇلتارالىق تاتۋلىقتى ساقتاۋدى ايتا كەلە، ادامدارعا وي- ساناسىن وزگەرۋگە كەڭەس بەردى.
جىلدا كوكتەمدە ەلىمىزدەگى بارلىق ۇلت وكىلدەرى داستۇردەن اينىماي استاناعا جينالادى. ەلباسى ءدال وسى كەزدەسۋدە قازاقستاندى مەكەن ەتكەن ورىس، كارىس، وزبەك، تاجىك سىندى جۇزدەن استام ەتنوستىڭ باسىن قوسىپ، كەڭەسەدى. ءار مينۋتىن الدىن الا جوسپارلاپ قوياتىن پرەزيدەنت بۇگىن قازاقستان حالقى اسسامبلەياسىنىڭ كەزەكتى سەسسياسىنا ءسال كەشىگىپ كەلدى. سويتسە، نۇرسۇلتان نازاربايەۆ ءانشى ديماشپەن كەزدەسىپ، كىدىرىپ قالىپتى.
«سەسسيانىڭ الدىندا ديماش قۇدايبەرگەن دەگەن بالامىزدى قابىلداپ، باتامدى بەردىم. قازاق وتە جاقسى كورگەننەن قۇشاعىنا قىسىپ ءولتىرىپ جىبەرۋى مۇمكىن، سودان بايقا دەدىم»، - دەيدى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ.
ديماش «تاۋەلسىزدىكتىڭ 100 تۇلعاسى» جوباسىنا كىرەدى دەدى ەلباسى. ال باسقالارعا تۇبەگەيلى وزگەرۋگە كەڭەس بەردى. ول ءۇشىن الدىمەن قوعامداعى ادامداردىڭ سانا-سەزىمىن جاڭعىرتۋ كەرەك. ءبىراق، ەلباسى ەكونوميكا، ساياساتتى دامىتۋعا قاراعاندا ازاماتتاردىڭ اراسىنداعى باسەكەلەستىكتى كوتەرۋ الدە قايدا قيىن بولاتىنىن ايتتى. سونىمەن، جاڭا زامانعا ساي بولۋ ءۇشىن ءار ادام كومپيۋتەردى يەگەرىپ، اعىلشىن تىلىندە ەركىن سويلەپ، ءبىلىمدى بولۋى ءتيىس.
ەلباسى سونداي-اق، اسىرا سىلتەپ، قىزدارعا قارا ورامال جامىلىپ، بەتىن تۇمشالاۋ حالقىمىزدىڭ سالت-داستۇرىنە، بولمىسىنا جات ادەت ەكەنىن تاعى ايتتى. ال كاسىپكەرلەردى بايىعان سايىن ءمارت بولۋعا شاقىردى. اسسامبلەيا جيىنىندا قازاقتىڭ ءتول ونەرى ايتىس دا ءسوز بولدى. ماسەلەن، اقىن ءجۇرسىن ەرمان: «شايىرلار پرەزيدەنتتى جىرلاعاندا جۇرت قاتتى قولدايدى» دەپ ەدى، نۇرسۇلتان نازاربايەۆ ونداي ايتىستاردى ۇناتپايمىن دەپ تىيىپ تاستادى.
«مەنىڭشە، ايتىس الدىمەن وبلىستاردا وتسە، سول جەرلەردەن جەڭىمپاز شىقسا، ولاردى تاڭداپ، رەسپۋبليكا بويىنشا كورسەتسە، دۇرىس بولار ەدى. كىلەڭ دۇلدۇلدەر شىعۋى ءتيىس. ونىڭ ءسوزى انىنە ساي بولۋى قاجەت. ايتپەسە، سەندەر «نازاربايەۆتى ماقتاڭدار» دەپ تاپسىرما بەرەسىڭدەر، سودان نەشە ءتۇرلى بالەلەر ايتىلىپ كەتەدى. ادام تىڭدامايتىن»، - دەيدى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ.
ءبىراق ءجۇرسىن ەرماندا توسىلىپ قالمادى. ەلباسىنىڭ ەسكەرتۋىن جۋىپ-شايۋعا كىرىستى.
«ايتىستاردا ءسىزدىڭ پورترەتىڭىزدى جاساعان كەزدە زالداعىلار ۋىلداپ- شۋىلداپ قولداپ وتىرادى. سول كەزدە ، كوزىمە جاس كەلەدى. مەن جاعىمپازدىقتان ايتىپ وتىرعان جوقپىن»، - دەيدى اقىن ءجۇرسىن ەرمان.
جاعىمپازدىققا جانى قاس ەكەنىن تاعى قايتالاعان مەملەكەت باسشىسى باستىسى بىرلىكتى كوزدىڭ قاراشىعىنداي ساقتاۋ كەرەكتىگىن شەگەلەپ ايتتى.
سونداي-اق، پرەزيدەنت قازاقستاننىڭ ينتەراكتيۆتى كارتاسىن كەلەسى جىلعا دەيىن قۇرۋدى ۇسىندى. ەلەكتروندى كارتادان كەزىندە جەر اۋىپ كەلگەن وزگە ەتنوستاردىڭ قايدا شوعىرلانعانىن، ءوسىپ ونگەنىن، قازاقتان قانداي قامقور كورگەنىن بىلۋگە بولادى. سونداي-اق ەلباسى اسسامبلەياعا پيعىلى ارام ءدىني توپتارعا قارسى شارالاردىڭ جوسپارىن ازىرلەۋگە پارمەن بەردى.
