مەدەۋ ارىنبايەۆ: بىزدە ديماش سياقتى جاستار كوپ، ءبىراق ولاردى قولدامايدى

استانا. قازاقپارات - ءانشى مەدەۋ ارىنبايەۆتىڭ ايتۋىنشا، ەلىمىزدە ديماش سياقتى دارىندى جاس انشىلەر كوپ.

تەك ولاردى ساحناعا الىپ شىعۋعا قاۋقارى بار پروديۋسەرلەر مەن قالتالىلار تالانتتارعا قولداۋ كورسەتپەي وتىر.

بۇل تۋرالى ارىنبايەۆ 7-ارنانىڭ «گۋ-گۋ-گاپ» باعدارلاماسىندا ايتتى، دەپ جازادى Stan.kz.

«ديماشتان باسقا جاس انشىلەر كوپ. قازىر ەسىمدەرىن اتاماي-اق قويايىن، «قازاقستان داۋىسىندا» شىققان 2-3 حالىقارالىق دارەجەدەگى ءانشى بولدى. ءبىراق ولار ەكراننان جوعالىپ كەتتى. وزدەرىنە پروديۋسەر تاپپاي جاتىر ما، كەلىسپەي جاتىر ما، كەلىسىم-شارتتار ويلارىنان شىقپاي جاتىر ما، بىلمەيمىن نەگە ەكەنىن... نەگە قارا بەت باسىپ قالاتىندارىن تۇسىنبەي قالامىن. بىزدە شەتەلدەرگە بارىپ، باسقا بايقاۋلاردا جەڭىپ قايتساڭ عانا سەن ءوز ەلىڭدە قۇرمەتتىسىڭ، باعالىسىڭ. سولاي قالىپتاسىپ قالعان.

وسى جەردە ءجۇرىپ ءبىزدىڭ پروديۋسەرلەرىمىز سولاردى نەگە جەتەلەمەي قالادى ەكەن، قالتالى ازاماتتار نەگە قولدامايدى ەكەن دەگەن سۇراق بارلىعىمىزدا تۋىندايدى»، - دەپ ءتۇسىندىردى ول.

ارىپتەسىنىڭ پىكىرىن ءانشى ءدىلناز احمادييەۆا دا قولداپ وتىر.

«ءبىزدىڭ ەلىمىزدە كەز كەلگەن بايقاۋعا قاتىسا الاتىن تالانتتى ادامدار از ەمەس. ولاردى دۇرىس دايىنداۋ كەرەك. حالىقتىڭ ابىرويىن اسقاقتاتىپ، ۇياتقا قالماس ءۇشىن تالانتتى، كرەاتيۆتى، شىن مانىندە ونەرلى ادامداردى جىبەرگەن ءجون»، - دەيدى ول.

ولاردىڭ بۇل پىكىرىنە ءانشى نۇرلان ابدۋللين مەن كۇيشى سىرىمتاي ەڭسەپوۆ تە قوسىلدى.