ەلورداعا باسقا قالادان كەلگەن زەينەتكەر قوعامدىق كولىكتە تەگىن جۇرە الا ما

  دەپ حابارلايدى قازاقپارات.

 اۆتوبۋستاردىڭ بىرىندە جولاۋشى مەن قوعامدىق كولىك جۇرگىزۋشىسىنىڭ اراسىندا داۋ تۋدى. استاناعا قوستانايدان قىدىرىپ كەلگەن ەگدە جاستاعى اپا زەينەتكەر ەكەندىگىن ايتىپ، جولاقىسىن تولەۋدەن باس تارتسا، جۇرگىزۋشى ونىڭ باسقا قالادان كەلگەندىگىن جەتكىزىپ، جولاقى تولەۋىن تالاپ ەتىپ جاتتى. اۆتوبۋس سالونىندا ادامدار دا زاڭنىڭ بارلىعىنا بىردەي ەكەندىگىن، سوندىقتان قوستانايلىق زەينەتكەردىڭ دە تەگىن ءجۇرۋى تيىستىگىن ايتقاندارى بولدى. وسىعان وراي استانا قالالىق ءماسليحاتىنىڭ دەپۋتاتى رامزيا ومىربايەۆادان باسقا قالادان كەلگەن زەينەتكەرلەردىڭ ەلوردانىڭ قوعامدىق كولىكتەردە جولاقىسىن تولەۋگە مىندەتتى مە دەپ سۇراعان ەدىك.

« كەز كەلگەن بيۋدجەت ەڭ الدىمەن قالاعا عانا شاقتالىپ ەسەپتەلىنەتىندىگىن تۇسىنگەنىمىز ءجون. قارجىلاندىرۋ قالادا تۇراقتى تىركەۋدە، الەۋمەتتىك قورعاۋ باسقارماسىندا ەسەپتە تۇرعان ادامدارعا عانا بولىنەدى. زەينەتكەرلەردىڭ قوعامدىق كولىكتەردە تەگىن ءجۇرۋ مۇمكىندىگىنەن بولەك تە كورسەتىلەتىن كومەك تۇرلەرى بار»، - دەدى ول.

وسى رەتتە ر. ومىربايەۆا باسقا قالادا كەلگەن زەينەتكەرلەر جاعدايلارىن ايتىپ ءماسليحاتقا جۇگىنەتىن بولسا مۇمكىنشىلىككە قاراي كومەك كورسەتۋگە تىرىساتىندىقتارىن باسا ايتتى.

 « بۇكىل قازاقستان جايىندا ايتار بولساق، نەگىزىنەن بۇل ماسەلە رەسپۋبليكالىق بيۋدجەتكە قاتىستى. سوندىقتان ءبىر قالادان ەكىنشى قالاعا كەلگەن زەينەتكەرلەردىڭ قوعامدىق كولىكتەردە تەگىن ءجۇرۋى ماسەلەسى جەرگىلىكتى ءماسليحات دەڭگەيىندە ەمەس، ق ر پارلامەنتى ءماجىلىسى دەڭگەيىندە شەشىلگەنى ءجون بولار ەدى»، - دەدى ءماسليحات دەپۋتاتى.

اۆتور: مارلان جيەمباي