رەسەيدە ورتالىق ازيادان ادام مۇشەلەرىن تاسىمالداۋشى ۇستالدى
استانا. قازاقپارات - رەسەيدىڭ سانكت-پەتەربۋرگ قالاسىندا ورتالىق ازيادان ادام مۇشەلەرىن تاسىمالداۋشىنى ۇستادى، دەپ حابارلايدى «فونتانكا» سايتى.
وقىس وقيعا مەترونىڭ «گوركوۆسكايا» ستانساسىندا بولعان. 22- ساۋىردە پوليتسيا جاس جىگىتتى ۇستادى.
ول ادام مۇشەلەرى سالىنعان قوراپتى الىپ بارا جاتقان. پوليتسيا قىزمەتكەرلەرى ودان ىشكى مۇشەلەر سالىنعان ون شاقتى پلاستيك كونتەينەردى تاپتى.
23 جاستاعى قىرعىز رەسپۋبليكاسىنىڭ ازاماتىنىڭ ايتۋىنشا، ول پەتەربۋرگتەگى مەديتسينالىق وقۋ ورىندارىنىڭ بىرىندە ءبىلىم الادى جانە كەلىسىم بويىنشا زەرتحانادان بيوماتەريالداردى ەمحاناعا جەتكىزىپ بەرەدى.
الايدا ەشقانداي ىلەسپە قۇجاتتاردى كورسەتە المادى. پوليتسيا قىزمەتكەرلەرى كونتەينەرلەردى ءىستىڭ ءمان-جايى انىقتالعانشا تاركىلەدى.
