قىرعىزستاندا كيىز ءۇي تىگۋدەن جاڭا رەكورد ورناتىلدى
استانا. قازاقپارات - قىزىل تۋ اۋىلىنىڭ تۇرعىندارى 9 مينۋت 55 سەكۋندتا كيىز ءۇي ورناتىپ، جاڭا رەكورد جاسادى.
كيىز ءۇيدى جىلدام تىگۋ باعدارلاماسى كەشە ىستىقكول جاعالاۋىندا وتكەن «تون الامى» تۋريستىك جارمەڭكەسى اياسىندا ءوتتى، دەپ حابارلايدى turmush.kg.
6 ادامنان تۇراتىن كوماندا كاپيتانىنىڭ ايتۋىنشا، كوماندا قۇرامى بۇل ىسكە جاتتىقپايدى، ولار كيىز ۇيدە تۋىپ وسكەن.
«ءبىز التاۋمىز جىلدام كيىز ءۇي قۇرۋ ءۇشىن ادەيى جاتتىقپايمىز. بىزدە اۋىلدا ءار وتباسىندا كيىز ءۇي قۇرادى، سوندىقتان ونىڭ ەگجەي-تەگجەيىن جاقسى بىلەمىز. ەكىنشى دۇنيەجۇزىلىك كوشپەندىلەر ويىنىندا ءبىز 10 مينۋت 16 سەكۋندتا كيىز ءۇي قۇرىپ گران-پري العانبىز. قازىر 9 مينۋت 55 سەكۋندتا ورناتىپ، رەكوردتى جاڭارتتىق»، - دەدى كوماندا كاپيتانى تولوسۋن بەكتەمىروۆ.
