الماتىدا اۋقىمدى مارافون ءوتتى - فوتو
الماتىدا مارافون 6 جىل ىشىندە قالالىق شارالار كۇنتىزبەسىنىڭ ماڭىزدى بولىگىنە اينالدى. ونى وتكىزۋ ۋاقىتى الماتىدا جىلى اۋا رايىمەن ءدال كەلىپ جاتادى.
جۇگىرەتىندەردىڭ باسىم بولىگى كاسىبي سپورتشىلار ەمەس، كوپشىلىگى مارافونعا ءوزىنىڭ دەنساۋلىعى مەن دەنەسىن شىنىقتىرۋ ءۇشىن قاتىساتىندار.
بيىل مارافونعا الەمنىڭ 38 ەلىنەن 13000 نان استام ادام جازىلدى. شارانىڭ اشىلۋىندا الماتى اكىمى باۋىرجان بايبەك پەن ۆەلوسپورتتان وليمپيادا چەمپيونى الەكساندر ۆينوكۋروۆ شىقتى.
قاتىسۋشىلار اراسىندا ەسترادا، سپورت جۇلدىزدارى دا بار. ءسوز سويلەگەندەر الماتىداعى مارافوننىڭ بۇقارالىق سپورتتى دامىتۋدا ماڭىزى زور ەكەنىن اتاپ ءوتىپ، قاتىسۋشىلارعا ءبىرىنشى كەزەكتە دەنساۋلىقتارىنا باسا نازار اۋدارۋدى تىلەدى.
قالا باسشىسى سالتاناتتى تۇردە جارىستى باستادى. مارافون باستالار الدىندا ءتۇرلى كومپانيالار، فيرمالار، ۋنيۆەرسيتەتتەر، قوعامدىق بىرلەستىكتەر وزدەرىنىڭ اكسيالارىن وتكىزىپ، كوماندالارىن تانىستىردى.
الماتىلىق ج و و ستۋدەنتتەرى ەكىدەن - كوماندالىق مارافونىنا تىركەلدى. ۇيىمداستىرۋشىلار وعان 80 كوماندا جازىلعانىن اتاپ ءوتتى. قاتىسۋشىلاردىڭ جاسىنا شەكتەۋ جوق، باستى ولشەم - بەلگىلەنگەن قاشىقتىقتى ەڭسەرۋ ءۇشىن دەنساۋلىعى جارايتىن بولسا بولعانى.
ايتا كەتەرلىگى، قاتىسۋشىنىڭ جاسى ۇلكەن بولعان سايىن ۇزاعىراق قاشىقتىققا جۇگىرۋگە تىرىسادى.
مارە ورنى رەتىندە تاڭدالعان ورتالىق ستاديون الدىندا جۇگىرۋشىلەردى ەرىكتىلەر مەن الماتىلىقتار قولپاشتاپ تۇردى.
اتاپ وتسەك، قاتىسۋشىلار قۇرامىنىڭ كوبى 10 شاقىرىم قاشىقتىقتى تاڭدادى. قاتىسۋشىلارعا وزدەرىنە ىڭعايلى قاشىقتىقتى تاڭداۋ ۇسىنىلعان (3 شاقىرىم (بالالار)، 10 شاقىرىم، 21 شاقىرىم، 42 شاقىرىم، «ەكىدەن كوماندالىق مارافونى جانە سكانديناۆيالىق ءجۇرىس).
قاتىسۋشىلاردان جينالعان جارنانى ۇيىمداستىرۋشىلار بالالار ۇيىنە، ەمدەۋ مەكەمەلەرىنە، سپورت الاڭدارىن سالۋعا، سولارعا قاجەتتى زاتتار ساتىپ الۋعا جۇمسايدى.
