تالدىقورعاندىقتار گيننەستىڭ رەكوردىن جاڭارتۋعا نيەتتى

تالدىقورعان. قازاقپارات - تالدىقورعاندىقتار ءبىر تاۋلىك بويى دومبىرا شەرتتى، دەپ حابارلايدى قازاقپارات ءتىلشىسى.

«دومبىرا party - non stop» جوباسى قازاقستان اۋماعىندا العاش رەت قولعا الىنعان شارا. ۇلتتىق ناقىشتا بەزەندىرىلگەن قازاق ءۇيدىڭ تورىندە جەتىسۋلىق كۇيشىلەر، انشىلەر جانە قاراپايىم تۇرعىندار شاڭىراقتى دومبىرانىڭ قوڭىر ۇنىنە تولتىردى.

الماتى وبلىسىنىڭ ءار وڭىرىنەن كەلگەن ونەرپازدار، ءسۇيىنباي اتىنداعى فيلارمونيانىڭ ءداستۇرلى انشىلەرى قازاقتىڭ ءان-جىرىن، تەرمە-داستاندارىن، كۇيلەرىن ورىنداپ جينالعاندى ۇلتتىق ونەرمەن سۋسىنداتتى.

ۇيىمداستىرۋشىلار تاۋلىككە سوزىلعان شارانى گيننەستىڭ رەكوردتار كىتابىنا ەنگىزۋدى كوزدەدى.

ءبىراق رەكوردتى رەسمي بەلگىلەيتىن وكىلدەر دومبىرا كەشىنە كەلە المادى. دەگەنمەن ولارعا شارانىڭ تولىق بەينەجازباسى جىبەرىلەتىن بولدى. ەلىمىزدە تۇڭعىش رەت قولعا الىنعان اۋقىمدى دومبىرا كەشىندە جەتىسۋلىق ونەرپازداردىڭ بەلسەندىلىگىن اتاپ وتۋگە بولادى.

تاڭ اتقانشا كوز ىلمەي تامىلجىتا توككەن كۇيلەرى، اۋەزدى اندەرى مەن جىر-تەرمەلەرى ۇلكەن لەد ەكران ارقىلى كورسەتىلدى. ال كەشكە جينالعان جۇرت دومبىرا ءپاتيدى الەۋمەتتىك جەلىدەگى تىكەلەي ەفير ارقىلى ءبولىسىپ وتىردى.