ق ر پرەزيدەنتى: قازاقستاننىڭ ءاربىر ازاماتى باسەكەگە قابىلەتتى بولۋى كەرەك

استانا. قازاقپارات - ەلباسى نۇرسۇلتان نازاربايەۆ ەلىمىزدىڭ زيالى قاۋىم وكىلدەرىمەن كەزدەسۋى بارىسىندا باسەكەگە قابىلەتتىلىك ماسەلەسىنە ەرەكشە نازار اۋداردى، دەپ حابارلايدى قازاقپارات.

كەزدەسۋدە مەملەكەت باسشىسى «بولاشاققا باعدار: رۋحاني جاڭعىرۋ» اتتى ماقالاسىنداعى باستى بولىمدەردىڭ ءبىرى باسەكەلەستىك ماسەلەسىنە ارنالعاندىعىن ايتتى.

«بۇل وتە كۇردەلى ءارى نەگىزگى ماسەلە. مەملەكەت باسەكەگە قابىلەتتى بولۋى كەرەك، حالىق سوعان ساي بولۋى كەرەك جانە قازاقستاننىڭ ءاربىر ازاماتىنىڭ جەكە باسى باسەكەگە قابىلەتتى بولعانى دۇرىس. ءبىز قازىر تەك قازاقستاندىق قانا ەمەس بۇكىل دۇنيەجۇزىلىك دەڭگەيدەگى ۇرپاقتى تاربيەلەپ وتىرمىز. بۇگىنگى ۇرپاق وزگە ەلدە جولىن تاۋىپ، جاقسى تابىس تاۋىپ، جاقسى قىزمەت ەتىپ جاتسا، ونىڭ ەشقانداي ايىبى جوق. باسەكەگە قابىلەتتى بولۋ ءار جاستىڭ، ءار ادامنىڭ ويىندا بولۋى كەرەك. باسەكەگە قابىلەتتى جاس جاڭا زامان تەحنولوگياسىن مەڭگەرىپ، ءتىل ءبىلىپ، مادەنيەتتى بولۋى شارت. بۇل رەتتە وسى سياقتى كوپتەگەن ماسەلەلەردى مىسالعا كەلتىرۋگە بولادى. اربىردەن سوڭ جاستار باسەكەگە قابىلەتتى بولۋى ءۇشىن ولاردىڭ دەنساۋلىقتارى دا مىقتى بولۋى قاجەت، سانالارى جاڭالىقتاردى قابىلداۋعا اشىق بولۋى شارت. ءبىزدىڭ ەلگە 100 وقۋلىقتى اۋدارىپ الىپ كەلسەك دەگەن ماسەلە وسىدان تۋىنداپ وتىر»، - دەدى پرەزيدەنت.

 وسى رەتتە ەلباسى ەلىمىزدە جوعارى وقۋ ورىندارىندا قاجەتتى وقۋلىقتاردىڭ بارلىعى تابىلا بەرمەيتىندىگىن اتاپ ءوتتى.

«تاريح، فيلوسوفيا، پسيحولوگيا ماسەلەلەرى بويىنشا زامانعا ساي وقۋلىقتار تابىلا بەرمەيدى. ال ءبىزدىڭ سانامىز دۇنيەجۇزىلىك دەڭگەيدە ويلاي بىلەتىن بولۋى كەرەك. ويتكەنى بىزدە باسەكەگە قابىلەتتى بولۋدان باسقا جول جوق»، - دەدى مەملەكەت باسشىسى.