ەلباسى: تۋعان جەرگە دەگەن سۇيىسپەنشىلىك تاقىرىبىن جانداندىرۋ قاجەت

استانا. قازاقپارات - بۇگىن ەلىمىزدىڭ زيالى قاۋىم وكىلدەرىمەن كەزدەسكەن ەلباسى نۇرسۇلتان نازاربايەۆ تۋعان جەرگە دەگەن سۇيىسپەنشىلىكتەن باستاۋ الاتىن پاتريوتيزم تاقىرىبىن جانداندىرۋ قاجەتتىگىنە نازار اۋداردى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

كەزدەسۋ بارىسىندا قازاقستان پرەزيدەنتى ءوزىنىڭ تاياۋدا جارىق كورگەن «بولاشاققا باعدار: رۋحاني جاڭعىرۋ» اتتى ماقالاسىنىڭ كەيبىر باعىتى مەن باسىمدىقتارىنا توقتالدى. سونداي-اق كەزدەسۋدە تاۋەلسىزدىك جىلدارىندا ىسكە اسىرىلعان ءىرى شىعارماشىلىق جوبالاردىڭ ماڭىزدى ماسەلەلەرى تالقىلاندى.

ماسەلەن، قازاقستان اۋماعىنداعى تاريحي-مادەني ەسكەرتكىشتەر مەن نىسانداردى قالپىنا كەلتىرۋگە سەپتىگىن تيگىزگەن «مادەني مۇرا» باعدارلاماسى، سونداي-اق الەمنىڭ جەتەكشى ارحيۆتەرىنەن ەلىمىزدىڭ تاريحىنا قاتىستى قۇجاتتاردى جۇيەلى تۇردە جيناقتاپ، تالداۋ جۇرگىزۋگە مۇمكىندىك بەرگەن «حالىق تاريح تولقىنىندا» باعدارلاماسى اڭگىمەگە ارقاۋ بولدى.