قازاقستاندا شيپاجايلارعا «جۇلدىزدار» بەرىلمەك

بۇل جايىندا قازاقستاننىڭ ۇلتتىق شيپاجايلار قاۋىمداستىعىنىڭ پرەزيدەنتى ساياگۇل قايىرگەلدينا ءمالىم ەتتى، دەپ حابارلايدى قازاقپارات.

«قازاقستان رەسپۋبليكاسىنىڭ شيپاجايلار قورىنىڭ ۇلتتىق ءتىزىلىمىن جاساۋدى اياقتاپ، ونى قازاقستاندىق شيپاجايلار بازاسىندا ساۋىعۋ مۇمكىنشىلىگى تۋرالى قولجەتىمدى اقپاراتتارمەن قامتاماسىز ەتۋ ءۇشىن شىنايى جۇمىس تەتىگىنە اينالدىرۋ قاجەت. سونىمەن قاتار شيپاجاي نىساندارىنىڭ مىندەتتى جىكتەمەسىن بەكىتىپ، مەديتسينالىق قىزمەت دەڭگەيى مەن ورنالاسۋ جايلىلىعى بويىنشا ساناتتارعا ءبولۋ كەرەك. (.. .)

شيپاجاي ۇيىمدارىنىڭ «جۇلدىزى» ، سەرتيفيكاتى، اككرەديتاتسياسى مەن اتتەستاتسياسى بويىنشا دا جۇمىس جۇرگىزبەك ويىمىزدا بار. ويتكەنى، قازىرگى تاڭدا بۇل سالامەن، شيپاجاي باعىتىمەن اينالىساتىن ورگان جوق» ، - دەدى ساياگۇل قايىرگەلدينا بۇگىن «شيپاجاي-2017» عىلىمي- تاجىريبەلىك كونفەرەنسياسى بارىسىندا.

دەگەنمەن، ونىڭ ايتۋىنشا، قازاقستاننىڭ ۇلتتىق شيپاجايلار قاۋىمداستىعى شيپاجايلارعا «جۇلدىز» بەرۋمەن اينالىسپايدى. ونىڭ سوزىنە قاراعاندا، شيپاجاي ۇيىمدارى مەديتسينالىق مەكەمەلەر سەكىلدى اتتەستاتسيادان ءوتۋى ءتيىس. بۇل شيپاجايدىڭ مەديتسينا قىزمەتكەرلەرىنە عانا ەمەس سونىمەن بىرگە اتالعان ۇيىمداردىڭ توپ- مەنەدجەرلەرىنە دە قاتىستى. مۇنان بولەك، قاۋىمداستىق قازاقستاننىڭ شيپاجاي ۇيىمدارىنىڭ پاسپورتتالۋىن قالىپتاستىرۋ بويىنشا دا قۇجاتتار ازىرلەمەك.

«شيپاجايلىق ەمدەۋگە قاتىسى بار كەشەندەردىڭ بارلىق نىساندارىن باسقارۋدىڭ ءبىرىڭعاي جۇيەسىن قۇرۋ قاجەت. ياعني، شيپاجايلاردى باسقارۋدىڭ ورتالىقتاندىرىلعان جۇيەسىن قۇرعان ءجون» ، - دەدى قاۋىمداستىق پرەزيدەنتى.

 ايتا كەتەيىك، بۇگىنگى تاڭدا قازاقستاندا 200 دەن استام شيپاجاي بار.

اۆتور: مارلان جيەمباي