قازاق فيلم قىسقامەتراجدى كوركەم فيلمدەر سەناريىنە بايقاۋ جاريالادى

استانا. قازاقپارات - شاكەن ايمانوۆ اتىنداعى «قازاق فيلم» كينوستۋدياسىنىڭ «دەبيۋت» شىعارماشىلىق- وندىرىستىك بىرلەستىگى قىسقامەتراجدى كوركەم فيلمدەردىڭ سەناريلەرىنە بايقاۋ جاريالادى،

  دەپ حابارلايدى قازاقپارات.

«شارتقا سايكەس، بايقاۋعا قازاقستان رەسپۋبليكاسىنىڭ ازاماتتارى عانا قاتىسا الادى. سەناري كولەمى 5-20 بەت بولۋى كەرەك. قازاق نەمەسە ورىس تىلدەرىندە جازىلعان سەناري نەمەسە ادەبي شىعارمالار جەلىسى بويىنشا (ءبىر نەمەسە بىرنەشە اۆتورلار) بولۋى ءتيىس. ۇمىتكەرلەردىڭ ءبىلىمى ارنايى نەمەسە كينەماتوگرافيا سالاسىنا جاقىن بولۋى قاجەت، سونداي-اق بۇرىن سەناريشى نەمەسە رەجيسسەر رەتىندە جاساعان جوبالارى بولعانى ابزال»، - دەلىنگەن باسپا ءسوز بايانىندا.

سەناري مازمۇنىندا كونستيتۋتسيالىق قۇرىلىمدى كۇشتەپ وزگەرتۋدى ۇگىتتەۋ نەمەسە ناسيحاتتاۋ، رەسپۋبليكانىڭ تۇتاستىعىن بۇزۋ، مەملەكەت قاۋىپسىزدىگىنە زيانكەستىك جاساۋ، الەۋمەتتىك، ناسىلدىك، ۇلتتىق، ءدىني، تەكتىك جانە رۋلىق ۇستەمدىكتى، قاتىگەزدىك پەن زورلىق- زومبىلىقتى ۇگىتتەۋ نەمەسە ناسيحاتتاۋ كورىنىستەرى بولماۋى كەرەك. سونىمەن قاتار پورنوگرافيالىق جانە ارناۋلى سەكسۋالدىق-ەروتيكالىق سيپاتتاعى كورىنىستەر بار سەناريلەر دە قاتىستىرىلمايدى.

«دەبيۋت» شىعارماشىلىق- وندىرىستىك بىرلەستىگى قابىلدانعان سسەناريلەردىڭ وندىرىسكە جىبەرىلۋىنە كەپىلدىك بەرمەيدى. سسەناريلەر 2017 -جىلدىڭ 1 - مامىرىنا دەيىن قابىلدانادى.

اۆتور: قانات مامەتقازى ۇلى