سولتۇستىك قازاقستانعا قونىستاناتىن وتباسىلارعا تەگىن باسپانا بەرۋ ۇسىنىلدى
بۇگىن پارلامەنت ءماجىلىسىنىڭ جالپى وتىرىسىندا دەپۋتات كارىباي مۇسىرمان وسى ماسەلەنى كوتەردى، دەپ حابارلايدى قازاقپارات.
«ءبىزدىڭ دەپۋتاتتىڭ ساۋالىمىزعا ەلباسىنىڭ جولداۋىنا سايكەس، ەڭبەك نارىعىن جاڭعىرتۋ ماقساتىندا ەڭبەككەرلەردى ارتىق جۇمىس كۇشى بار وڭىرلەردەن جۇمىس كۇشى جەتىسپەيتىن وڭىرلەرگە قونىستاندىرۋدىڭ وزەكتى ماسەلەلەرى ارقاۋ بولدى. وسى مەملەكەتتىك تۇرعىدان العاندا، اسا ماڭىزدى ءىستىڭ جەرگىلىكتى جەرلەردە ورىندالۋى قاناعاتتانارلىقتاي ەمەس.
وتكەن جىلى ۇكىمەت قاۋلىسىمەن جۇمىس كۇشى ارتىق وڭىرلەردە تۇراتىن وتباسىلاردى جۇمىس كۇشى جەتىسپەيتىن وڭىرلەرگە قونىستاندىرۋعا بولىنگەن 463 كۆوتانىڭ 196 سى عانا يگەرىلگەن. ياعني ءتيىستى تاپسىرما نەبارى 42 پايىزعا ورىندالعان. وسى ورايدا سولتۇستىك قازاقستان وبلىسى عانا ايرىقشا مۇددەلىلىك تانىتىپ، وتكەن جىلى كۆوتاداعى 110 وتباسىنىڭ ورنىنا 129 وتباسىنى قابىلدادى»، - دەپ توقتالدى دەپۋتات.
بۇل تۇرعىدا ول الداعى ۋاقىتتا تۇرعىنداردى جۇمىس كۇشى ارتىق وڭىرلەردەن ەڭبەك كۇشى جەتىسپەيتىن وبلىستارعا قونىستاندىرۋ شارالارىنىڭ قارقىنى مەن ۇتىمدىلىعىن ارتتىرۋ ماقساتىندا ءتيىستى ۇسىنىستاردى جاريا ەتتى.
«بىرىنشىدەن، قونىس اۋدارۋشىلاردى قابىلداۋدىڭ 2017-2019 -جىلدارعا وڭىرلىك كۆوتاسىن ءبولۋ ماسەلەسىن قايتا قاراۋ قاجەت. وتكەنى ۇستىمىزدەگى جىلى ارتىق جۇمىس كۇشى بار وڭىرلەردەن جۇمىس كۇشى جەتىسپەيتىن وڭىرلەرگە 288 وتباسىنى قونىستاندىرۋ بەلگىلەنگەن. الايدا بۇل جەتكىلىكسىز. سەبەبى ءبىر عانا سولتۇستىك قازاقستان وبلىسى بيىل كۆوتاداعى 110 وتباسىنىڭ ورنىنا 310 وتباسىنى قابىلداۋعا دايىن ەكەندىگىن مالىمدەپ وتىر»، - دەدى ك. مۇسىرمان.
ونىڭ پايىمىنشا، جۇمىس كۇشى ارتىق وڭىرلەر تۇرعىندارىنىڭ ەڭبەك كۇشى جەتىسپەيتىن وبلىستارعا بىرنەشە وتباسى بولىپ، شوعىرلانا كوشكەنىن ۇيىمداستىرعان ءجون. مۇنىڭ ءوزى، ولاردىڭ بارعان جەرلەرىنە تەزىرەك بەيىمدەلۋىنە وڭ اسەرىن تيگىزەدى.
«ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 -جىلدارعا ارنالعان باعدارلاماسى بويىنشا قونىس اۋدارۋشىلاردىڭ تۇرعىن ءۇيدى جالعا الۋىنا بولىنەتىن قىرۋار قارجىعا ولاردىڭ وزدەرى كوشىپ باراتىن ەلدى مەكەندەردەگى بوساپ تۇرعان ۇيلەردى ساتىپ الۋىنا رۇقسات بەرۋ كەرەك. بۇعان قوسا، قونىس اۋدارۋشىلاردىڭ وزدەرى ءۇشىن تۇرعىن ءۇي سالۋىنا مۇمكىندىك تۋعىزۋ جانە ولاردى ءتيىستى ينفراقۇرىلىممەن قامتاماسىز ەتۋ قاجەت. بۇل شارالار جەرگىلىكتى اتقارۋشى ورگانداردىڭ قونىس اۋدارۋشىلاردى باسپانامەن قامتىلۋىن الدەقايدا جەدەلدەتەرى ءسوزسىز. ۇكىمەت بولگەن كۆوتانىڭ وتكەن جىلى تولىق يگەرىلمەۋىنىڭ نەگىزگى سەبەبى وسى ەكەندىگى ەسكەرىلۋگە ءتيىستى»، - دەدى دەپۋتات.
سونىمەن قاتار ول تۇرعىن ءۇيدى جالعا الۋ كەلىسىمشارتىندا ەگەر قونىس اۋدارۋشىنىڭ وتباسى كەمىندە 5 جىل بويى تۇرعان جاعدايدا وعان سول تۇرعىن ءۇيدى تەگىن جەكەشەلەندىرۋ قۇقىعى بەرىلۋىن قاراستىرۋ كەرەكتىگىن ۇسىندى.
«قوستاناي، پاۆلودار، سولتۇستىك قازاقستان، شىعىس قازاقستان وبلىستارىنىڭ قونىس اۋدارۋشىلاردى قابىلداۋعا الەۋەتى بار ەلدى مەكەندەردىڭ تىزبەسىن جاساپ، ولارداعى ءبىلىم بەرۋ مەن دەنساۋلىق ساقتاۋ مەكەمەلەرىنىڭ وقۋشىلار مەن تۇرعىنداردىڭ سانىنىڭ ازايۋىنا بايلانىستى جابۋعا موراتوري جاريالاعان ءجون»، - دەدى كارىباي مۇسىرمان.
اۆتور: رۋسلان عابباسوۆ
