قىتايداعى قازاق ءتىلى عالىمى كاكەش قايىرجان ۇلى دۇنيەدەن وزدى

 استانا. قازاقپارات - سانالى عۇمىرىن قىتايداعى قازاقتاردىڭ سانا بوستاندىعى مەن رۋحانياتىنا ارناعان اتاقتى عالىم  بىلىكتى ءتىل عالىمى، اۋدارماشى كاكەش قايىرجان ۇلى ۇزاق ناۋقاستان كەيىن بۇگىن تاڭعا جۋىق دۇنيە سالدى.

قىتايداعى قازاق ءتىلى عالىمى كاكەش قايىرجان ۇلى دۇنيەدەن وزدى

كاكەش قايىرجان ۇلى 1941 -جىلى شىڭجاڭ ولكەسى، ىلە قازاق اۆتونوميالى وبلىسى، تارباعاتاي ايماعى، تولى اۋدانىندا دۇنيەگە كەلگەن. شىڭجاڭ ولكەلىك پارتكوم كەڭسە ىستەر مەڭگەرمەسىنىڭ اۋدارماشىلار باسقارماسى، شىڭجاڭ حالىق راديوسىنىڭ قازاق رەداكسياسى، شىڭجاڭ تەليەۆيزياسى قازاق ءبولىمى سەكىلدى ورىنداردا قىزمەت ىستەدى. شىڭجاڭ تەليەۆيزياسى قازاق رەداكسياسىنىڭ العاشقى مەڭگەرۋشىسى بولدى. اۋدارماشى «كاليلا مەن دەمينا» ، «وسىزامانعى شەتەل جازۋشىلارىنىڭ اڭگىمەلەرىنەن» ، «ساكيا مۋني» ، «قۇران حيكايالارى» (قازاقستان «جالىن» باسپاسى كوشىرىپ باسقان) جانە «چيڭ اۋلەتى ساراي جىلنامالارىنداعى قازاققا قاتىستى دەرەكتەر» (قاھارمان مۇقان ۇلىمەن بىرگە اۋدارعان) ، «قىتاي تاريحىنداعى قازاققا قاتىستى دەرەكتەر» (ابدىلدابەك اقىشتاي، شادىمان اقىمەت قاتارلىلارمەن بىرلەسىپ اۋدارعان) سىندى اۋدارمالارى جارىق كورگەن. «قۇران حيكايالارى» ولكەلىك قوعامدىق عىلىم سالاسى بويىنشا 3 رەتكى تاڭداۋلى كىتاپتاردى ساراپتاۋدا 1- دارەجەلى سىيلىق العان.
 « ءسوز ساندىق» اتتى قىمباتتى قازىنا 2010 -جىلى «ۇلتتار» باسپاسىنان قايتالاي باسىلۋمەن قاتار، 2014-جىلى قازاقستاننىڭ ونەر باسپاسىنان مەملەكەتتىك باعدارلاما اياسىندا باسىلعان. كاكەش قايىرجان ۇلى تەرمينولوگيا، اۋدارما، ادەبي ءتىل، ادەپ جۇيەسى سەكىلدى تاقىرىپتاردا قىرۋار قۇندى ماقالالار جازدى. «اقپاراتتىق ادەبي ءتىل -  ۇلتتىق ءتىل مادەنيەتىمىزدىڭ ايناسى» ، «سوزدىك قۇرىلىسىمىزعا ۇڭىلسەك» قاتارلى ماقالالارى مەملەكەتتىك جانە ولكەلىك 1 -دارەجەلى سىيلىقتى ەنشىلەدى. قالامگەرگە مەملەكەتتىك كەڭەس ۇكىمەتتىك ەرەكشە ستيپەنديات يەگەرى اتاعىن بەرگەن. مارقۇمنىڭ جاتقان جەرى جايلى، توپىراعى تورقا بولسىن!