سۋدىڭ كەلۋىن يىسكەپ بىلە المايمىز - «قازسۋشار» وكىلى
«قازسۋشار» ر م ك اقتوبە بولىمشەسى ءۇش كۇندە لاپ ەتكەن سۋدىڭ بولجامىن دۇرىس جاساماعان «قازگيدرومەد» ر م ك- عا وكپەلى، دەپ حابارلايدى قازاقپارات ءتىلشىسى. اقتوبەدەگى سازدى، اقتوبە، قارعالى سۋ قويمالارى تولادى دەگەن جوسپار بولعانىمەن، كەلگەن سۋدىڭ اعىنى مۇنشالىقتى كوپ بولاتىنىن جاۋاپتى ماماندار دا بولجاي الماعان. سونىڭ سالدارىنان قازىر سۋ قويمالارىنا كەلىپ جاتقان سۋدىڭ ءبارى اعىزىلىپ جاتىر.
سەبەبى، قويمانىڭ ءبارى تولىپ تۇر. «11 -ساۋىردەن باستاپ اقتوبە وبلىسىنا كولەمى 500 ميلليون تەكشە مەتر سۋ كەلدى. سۋ اقتوبە، سازدى، قارعالى سۋ قويماسىن تولتىردى. ءقازىر كەلگەن سۋدىڭ ءبارىن تومەن قاراي تاستاپ جاتىرمىز. داعدارىس ءوتتى، دەگەنمەن سۋدىڭ كەلۋى توقتاعان جوق. ءبىز ءاربىر ەكى ساعات سايىن قاراپ، باقىلاپ وتىرمىز»، - دەدى «قازسۋشار» ر م ك اقتوبە بولىمشەسىنىڭ باسشىسى بەكزات نامەتوۆ.
ۇزاق جىلدار بويى اقتوبەدەگى سۋ قويمالارىندا جۇمىس ىستەپ جۇرگەن بىلىكتى مامان سۋدىڭ مول كەلۋى 1993 -جىلى تىركەلگەنىن ايتادى. ول كەزدە بارلىعى 966 ميلليون تەكشە مەتر سۋ كەلگەن ەكەن.
«قازىر 500 ميلليون تەكشە مەتر سۋ كەلىپ تۇر. 1 -مامىرعا دەيىن تاعى 200 ميلليون تەكشە مەتر سۋ كەلەدى. كوپشىلىك «نەگە الدىن الا جىبەرمەدىڭدەر» دەپ سۇرايدى. سۋ تاسقىنى باستالار الدىندا اقتوبە سۋ قويماسىندا 68 پايىز، قارالى سۋ قويماسىندا 57 پايىز قور بولدى. «قازگيدرومەد» ر م ك 120-240 ميلليون تەكشە مەتر سۋ كەلەدى دەپ بولجام ايتتى.
ادەتتە اقپاراتتىڭ 80 پايىزى ءدال كەلەتىن ەدى. ءبىراق سۋ ءۇش كۇندە لىق ەتە قالدى. ءوز كىنامىزدى بىرەۋگە يتەرىپ سالمايمىز. شەشىمىن تاپپاعان ماسەلە دە بار. ماسەلەن، گيدروبەكەتتىڭ سانىن 95 تەن 25 كە دەيىن ازايتتى. ءبارىن قايتا ورنىنا كەلتىرۋ كەرەك. ولار سۋ رەسۋرستارى كوميتەتىنە قارادى، «قازگيدرومەت» قورشاعان ورتانى قورعاۋ باسقارماسىندا بولدى. ال ءبىزدى اۋىل شارۋاشىلىعى مينيسترلىگىنە جىبەردى دە سونىندا تاراپ كەتتىك. ءبارى قوسىلماسا، بولمايدى. ءبىز ءوز ەركىمىزبەن الدىن-الا بولجاي المايمىز.
ونى «قازگيدرومەت» پەن گيدروبەكەت قاراماعاندا قايدان بىلەمىز؟ يىسكەپ بىلەمىز بە؟»، - دەدى بەكزات نامەتوۆ.
ماماننىڭ ايتۋىنشا، سۋ ارناسىنداعى جەر بوس جاتۋى ءتيىس. سول كەزدە سۋ ءوز جولىمەن اعادى.
اۆتور: التىناي ساعىندىقوۆا
