اۋە اپاتىنان جالعىز ءوزى عانا ءتىرى قالعان جولاۋشىلاردىڭ تاريحى - فوتو

كەيبىر اۋە اپاتتارى ۇشاقتاعى جولاۋشىلاردىڭ بارلىعىنىڭ ءومىرىن جالماعانىمەن، سولاردىڭ اراسىندا كەيدە ءبىر عانا جولاۋشىنىڭ ءتىرى قالىپ جاتاتىن كەزدەرى ۇشىراسىپ تۇرادى. نازارلارىڭىزعا سونداي جايتتاردىڭ توپتاماسىن ۇسىنامىز.

 1. فرانچەسكا ليۋيس - پانامادا بولعان اۋە اپاتىندا جالعىز ءوزى ءتىرى قالعان 12 جاستاعى قىز

2007 -جىلى پانامانىڭ اياز قارىعان تاۋلارى اراسىندا اۋە اپاتىنان فرانچەسكا ليۋيس (Francesca Lewis) جالعىز ءوزى امان قالعان. وعان نەگىزگى سەبەپشى بولعان جايت - ۇشاق قۇلاعان ساتتە ونىڭ ءۇستىن جۇك باسىپ قالادى، ول ءوز كەزەگىندە قاتال تابيعاتتىڭ سۋىعىنان ءۇسىپ قالۋدان قورعاعان. الايدا، ۆۋلكاندى تاۋعا بەت العان سەسسنا (Cessna) مودەلدى شاعىن ۇشاقتا فرانچەسكامەن بىرگە ۇشقان قالعان ءۇش جولاۋشى اپاتتان امان قالا المادى. ولار - فرانچەسكونىڭ جاقىن قۇربىسى 13 جاسار تاليا كلياين (Talia Klein)، ونىڭ اكەسى 37 جاسار ميلليونەر مايكل كلياين (Michael Klein) جانە 23 جاستاعى پيلوت ەدۆين لاسسو (Edwin Lasso). ساراپشىلار بۇل ۇشەۋى بىردەن كوز جۇمعان دەپ ەسەپتەيدى.

فرانچەسكا اپات ورىن العاننان كەيىن سۋسىز جانە ءنار تاتپاي، ءوزى وتىرعان كرەسلوعا باسى تومەن قاراپ تاڭىلعان كۇيىندە ەكى جارىم تاۋلىك بويىنا اجالمەن ارپالىسقان. ءدال سول ساتتە ونىڭ ۇستىندە تەك جۇقا كەۋدەشە مەن قىسقا بالاقتى شالدارى بولعان.

سەسسنانىڭ اپاتقا ۇشىراۋى سانتا باربارا تۇرعىندارىنىڭ (كاليفورنيا، ا ق ش) ءوز دەمالىستارىن پانامادا وتكىزۋ جوسپارلارىن بۇزىپ قانا قويماي، ساياحاتتىڭ قايعىلى اياقتالۋىنا اكەپ سوقتى.

 2. باحيا باكاري - Yemenia Airways رەيسىنىڭ اپاتقا ۇشىراۋىنان جالعىز ءوزى ءتىرى قالعان 14 جاسار قىز

باحيا باكاري (Bahia Bakari) -  Yemenia Airways اۋە كومپانياسىنىڭ ۇشاعى اپاتقا ۇشىراعان سوڭ جالعىز ءوزى ءتىرى قالعان فرانسۋز رقۋشىسى. ول 626 ءنومىرلى رەيسپەن ۇشىپ كەلە جاتقاندا ۇشاق ءۇندى مۇحيتىنا گراند- كومور ارالىنىڭ سولتۇستىك جاعالاۋىنا تاياۋ جەرگە قۇلاعان.

152 ادامنىڭ ءومىرىن قيعان تراگەديا 2009 -جىلدىڭ 30 -ماۋسىمىندا ورىن العان. ۇزاق سۋعا قۇلاعان كەزدە سۋدا جۇزە بىلمەيتىن جانە ەشقانداي قۇتقارۋشى جيلەتسىز قالعان باكاري ۇشاقتىڭ سىنىق بولىكتەرىنىڭ ۇستىنە شىعىپ، 13 ساعات بويىنا كومەك كۇتكەن. كۇتۋگە كەتكەن ۋاقىتتىڭ باسىم بولىگى قارا تۇنەك تۇنگە تۇسكەن. قىزدى Sima Com 2 جەكە مەنشىك كەمەسىنىڭ ەكيپاجى قۇتقارىپ العان. قىزدى بايقاعان ەكيپاج مۇشەلەرى وعان قاراي قۇتقارۋ شەڭبەرىن تاستاعان، الايدا سۋدى قاتتى تولقىن تەربەتىپ تۇرعاندىقتان قاتتى شارشاعان قىزدىڭ وعان جارماسۋعا شاماسى جەتپەگەن.

 تەڭىزشىلەردىڭ ءبىرى -  ماتۋراففي سەلەمان ليبۋنا (Maturaffi Sélémane Libounah) سۋعا سەكىرىپ، باحيانىڭ قۇتقارۋ شەڭبەرىن پايدالانۋىنا كومەك كورسەتتى. جازعى دەمالىسىن كومور ارالدارىندا وتكىزۋدى جوسپارلاعان قىز وسىلايشا كۇتپەگەن جەردەن وزىمەن بىرگە پاريجدان ۇشىپ كەلە جاتقان اناسىنان ايىرىلعان.

3. موحاممەد ەل فاتەح وسمان - اپاتقا ۇشىراعان ۇشاقتىڭ 116 جولاۋشىسىنىڭ اراسىندا جالعىز ءوزى امان قالعان 3 جاسار بالا

2003 -جىلى موحاممەد ەل فاتەح وسمان (Mohammed el-Fateh Osman) Sudan Airways اۋە كومپانياسىنىڭ پورت- سۋدان (Port Sudan) قالاسىنان ۇشىپ شىعا سالىسىمەن ىلديعا قۇلاعان ۇشاعىندا بولعان جولاۋشىلار اراسىندا جالعىز ءوزى عانا ءتىرى قالعان. بوينگ 737-200C ۇشاعىنىڭ اتاپقا ۇشىراۋىنان 105 جولاۋشى مەن اۋە كەمەسى ەكيپاجىنىڭ 11 مۇشەسى اجال قۇشقان. الايدا، كەزدەيسوق كوشپەندى قۇلاعان اعاش ۇستىندە جاتقان بالانى تاۋىپ العان. ءۇش جاسار بالا كوپتەگەن جاراقاتتار الىپ، دەنەسىنىڭ ءبىراز جەرى كۇيگەن، اپاتتىڭ سالدارىنان ول سول اياعىنان ايىرىلعان.

4. سەسيليا سيچان - ا ق ش- تاعى ءىرى اۋە اپاتتارىنىڭ بىرىندە جالعىز ءوزى امان قالعان جولاۋشى رەتىندە تاريحتا قالاتىن قىز

1987 -جىلى Northwest Airlines اۋە كومپانياسىنىڭ №255 رەيسى دەترويت (Detroit) اۋەجايىنان ۇشىپ شىعا سالىسىمەن بىرنەشە مينۋتتاردان كەيىن جەرگە قۇلاعان. 154 ادامنىڭ ءومىرىن قيىپ كەتكەن بۇل اپاتتان 4 جاسار سەسيليا سيچان (Cecelia Cichan) عانا امان قالعان. قازا بولعانداردىڭ اراسىندا ونىڭ اناسى پاۋلا، اكەسى مايكل مەن 6 جاسار اعاسى دەۆيد (Paula, Michael, David) تە بولعان. وتباسى مۇشەلەرى دەمالىستان كەيىن ۇيلەرىنە قايتىپ كەلە جاتقان بولاتىن.

بىرنەشە كۇن بويى قىزدىڭ جەكە باسىن انىقتاۋ مۇمكىن بولماعان، سودان كەيىن عانا ونىڭ اجەسى جاڭالىقتاردان قىزدىڭ تىرناقتارى اشىق كۇلگىن ءتۇستى لاكپەن بويالعانىن جانە ونىڭ الدىڭعى ءبىر ءتىسى ارنايى قاپتالعانىن ەستىگەننەن كەيىن عانا ءوزىنىڭ نەمەرەسىن تانىعان. پاۋلين سياماچەلا (Pauline Ciamaichela) وتباسى مۇشەلەرىن جولعا شىعارىپ سالار الدىندا سەسيليانىڭ تىرناقتارىن لاۆاندا ءتۇستى لاكپەن ءوزى بوياپ بەرگەنىن ەسىنە العان.

5. رۋبەن ۆان اسسۋ - جان تۇرشىگەرلىك اۋە اپاتىنان ءبىر ءوزى عانا ءتىرى قالعان دات بالاسى

مۇمكىن ەمەس، ءبىراق بۇل فاكت - 9 جاسار دات بالاسى رۋبەن ۆان اسسۋ (Ruben van Assouw) اۋە اپاتى ورىن العان ليۆيا جازىقتارىنىڭ ورتاسىندا قيراعان ۇشاقتىڭ كرەسلوسىندا وتىرعان جەرىنەن تابىلدى. ونىڭ ەكى اياعى سىنعان، ەس- ءتۇسسىز جاتقانىمەن اۋىر تىنىس الىپ جاتقان.

Afriqiyah Airways رەيسى 2010 -جىلى 12 -مامىردا تريپولي (Tripoli) قالاسىنا ۇشىپ كەلە جاتىپ اپاتقا ۇشىراپ، ەكيپاج مۇشەلەرىن قوسا العاندا 103 ادامنىڭ ءومىرىن قيعان. رۋبەن ۆان اسسۋ وتباسىمەن بىرگە سافاريدەن ۇيىنە ۇشىپ كەلە جاتقان. بالا اۋرۋحاناعا تۇسكەننەن كەيىن بىرنەشە كۇن وتكەن سوڭ عانا جالعىز ءوزى ءتىرى قالعانىن ەستىگەن.

 ليۆيا بيلىگى جاراقاتتانعان بالانىڭ فوتوسىن جاريالاعاننان كەيىن دات جۋرناليستەرى ول جاتقان پالاتاعا كىرىپ، رۋبەن ۇشاقتاعى بارلىق ادامدار قايتىس بولعانىن جانە ءوزىنىڭ وسىلايشا وتباسىنان ايىرىلىپ، جەتىم قالعانىن ەستىپ- بىلگەنگە دەيىن ودان سۇحبات الىپ ۇلگەرەدى. قازىر بالانى ءوز قامقورلىقتارىنا العان اعاسى مەن اپكەسى ونىڭ ۇشاق اپات بولعان جەرگە بارىپ، وقيعانىڭ سەبەپتەرىن انىقتاعىسى كەلەتىنىن ايتادى.

6. ەريكا دەلگادو - اناسىنىڭ باتىلدىعى ارقاسىندا جالعىز ءوزى امان قالعان جولاۋشى

1995 -جىلى كولۋمبيانىڭ (Colombia) سولتۇستىگىندە اپاتقا ۇشىراعان ۇشاق جولاۋشىلارىنىڭ ىشىندە تەك 10 جاسار قىز بالا عانا ءتىرى قالعان. ۇشاق بورتىندا ونىمەن بىرگە 47 جولاۋشى جانە 5 ەكيپاج مۇشەسى بولعان.

بيلىك ورگاندارى DC-9 قۇرلىقارالىق اۋە كەمەسى اسپاندا جارىلعان دەسە، ماريا لا باحا (Maria La Baja) قالاسىنىڭ تۇرعىندارى ۇشاقتىڭ جاعاعا سوعىلىپ، ەشقانداي جارىلماستان شاعىن سۇيىسكە قۇلاعانى تۋرالى ايتادى.

اتا- اناسىمەن جانە ىنىسىمەن بىرگە بوگوتا (Bogota) قالاسىنان كاريب ارالدارىنىڭ كارتاحەنا (Cartagena كۋرورتتى قالاسىنا ۇشىپ شىققان ەريكا دەلگادو (Erika Delgado) قاتتى شوشىنعان جانە قولى سىنعان كۇيدە تابىلعان.

جەرگىلىكتى فەرمەر كومەك سۇراعان داۋىستى ەستىپ جۇگىرىپ بارعاندا تەڭىز بالدىرلارىنىڭ ۇيىندىسىنەن قىز بالانى تاپقان. ەريكا فەرمەرگە ۇشاق قۇلاعانعا دەيىن ونى اناسىنىڭ ۇشاقتان يتەرىپ جىبەرگەنىن ايتىپ بەرگەن.

7. پول ەشتون ۆيك - اۋە اپاتتارىنان امان قالعان ەڭ جاس ادام

بۇل اۋە اپاتى 1947 -جىلى قاڭتاردا ورىن العان. ءبىراق سودان بەرى پول ەشتون ۆيك (Paul Ashton Vick) جالپى اۋە اپاتىنان امان قالعان جانە سونىڭ ىشىندە ءبىر اۋە كەمەسىندەگى جولاۋشىلار ىشىندە جالعىز ءوزى ءتىرى قالعان الەمدەگى ەڭ جاس ادام بولىپ قالا بەرەدى. قىتاي ۇلتتىق اۋە كومپانياسىنىڭ رەيسىمەن ۇشقان كەزدە ول نەبارى 16 ايلىق ءسابي بولاتىن. پولدىڭ اكەسى روبەرت ۆيك (Robert Vick) ا ق ش- تىڭ كوننەكتيكۋت (Connecticut) قالاسىنىڭ باپتيستەر پاستورى بولعان. ۇلى وتان سوعىسىنان كەيىن قىتايعا ميسسيونەرلىك قىزمەتكە قاتىسۋعا بارعان.

روبەرت ۆيك ءوزىنىڭ ايەلىمەن جانە 2 بالاسىمەن (2 جاسار تەودور (Theodore) جانە 16 ايلىق پول) شانحاي - چانگكينگ (Shanghai - Chungking) رەيسىنە وتىرادى. ۇشۋ كەزىندە ۇشاقتىڭ قوزعالتقىشتارىنىڭ بىرىنەن ءورت شىعىپ، ونىڭ جالىنى تەز ارادا سالونعا تارالادى. ۇشاقتى قۇتقارۋ مۇمكىن ەمەس ەكەنىن سەزگەن 23 جولاۋشى جانىپ جاتقان ۇشاقتان سەكىرىپ كەتەدى. سولاردىڭ ىشىندە قولدارىنا ءبىر- ءبىر بالالارىن ۇستاعان ميستەر جانە ميسسيس ۆيك بولعان. ۇشاق جولاۋشىلارىنىڭ اراسىندا روبەرت پەن ونىڭ 16 ايلىق بالاسى پول عانا اپاتتان وسىلاي امان قالعان. الايدا، ارادا 40 ساعات وتكەننەن كەيىن پاستور دەنەسىندەگى العان جاراقاتتارىنان كوز جۇمادى، ولەر الدىندا گوسپيتال قىزمەتكەرلەرىنە بالاسىنىڭ اتاسى مەن اجەسىنىڭ مەكەنجايىن ايتىپ ۇلگەرەدى. بالا اتا- اجەسىنىڭ قولىندا تاربيەلەنىپ، ەم قابىلدايدى. اپات كەزىندە پولدىڭ اياعى بىرنەشە جەردەن سىنعان بولاتىن.

8. ۆونگ يۋ - ۇشاقتى ايداپ اكەتىپ، ونى اپاتقا ۇشىراتقان جانە اۋە اپاتىنان جالعىز ءوزى امان قالعان الەمدەگى ەڭ العاشقى ادام

ۆونگ يۋ (Wong Yu) 1948 -جىلى Cathay Pacific كومپانياسىنىڭ Miss Macao اۋە كەمەسىن ءوزىنىڭ سىبايلاستارىمەن بىرگە ايداپ اكەتەدى، الايدا ونىڭ بۇل ارەكەتى اۋە كەمەسىنىڭ اپاتقا ۇشىراپ، ونىڭ ەش كىناسىز 25 جولاۋشىسى مەن ەكيپاج مۇشەلەرىنىڭ قازاسىنا الىپ كەلەدى.

وتە داۋلەتتى جولاۋشىلاردى تاسىمالدايتىن PBY Catalina ماركالى گيدروۇشاق اۆياتسيا تاريحىندا ايداپ اكەتكەن ەڭ العاشقى كوممەرتسيالىق رەيس اتاندى. وقيعاعا كۋاگەر بولعان ەكى بالىقشى ۇشاقتىڭ سۋعا قالاي قۇلاعانىن كورىپ، ەس- ءتۇسسىز سۋدا جاتقان ەر كىسىنى جاعاعا الىپ شىققان. بۇل ۆونگ يۋ ەدى. كەيىنىرەك ونىڭ ۇشاقتى ايداپ اكەتكەندەردىڭ ءبىرى ەكەندىگى بەلگىلى بولىپ، وعان 3 جىل باس بوستاندىعىنان ايىرۋ جازاسى تاعايىندالعان.

 دەرەككوزى: https://www.bugaga.ru

اۋدارعان ايدار جاناي