قىتايداعى تانىمال تەلەارنا ديماش تۋرالى دەرەكتى فيلم كورسەتۋدە
ءتۇسىرىلىم كەزىندە استاناعا ارنايى كەلگەن قىتايلىق تەلەارنانىڭ جۋرناليسى ق ر مادەنيەت جانە سپورت ءمينيسترى ارىستانبەك مۇحامەدي ۇلىنان سۇحبات الدى، دەپ حابارلايدى مينيسترلىكتىڭ باسپا ءسوز قىزمەتى.
«قىتاي حالىق رەسپۋبليكاسى حۋنان پروۆينتسياسىنىڭ 8 ميلليوننان استام تۇرعىنى بار چاڭشا قالاسىنداعى بيىلعى «І аm Singer» جوباسىنا قازاقستان رەسپۋبليكاسىنان كەلگەن دارىندى ءانشى ديماش قۇدايبەرگەن ءسوز جوق بيىك دەڭگەيدەن كورىندى»، - دەپ حابارلايدى Hunan TV تەلەارناسىنىڭ باسپا ءسوز قىزمەتى.
قازاق ەلىنەن وسى دوداعا قاتىسقان جاس تا بولسا ۇلكەن دارىن يەسى عاجايىپ ونەر كورسەتىپ، ىرىكتەۋ كەزەڭدەرىندە الدىڭعى ورىنداردى، ال كەي رەتتەردە ۇنەمى ءبىرىنشى ورىنداردى يەلەندى. ءسويتىپ، ۇنەمى جوعارى تۇعىردان تابىلىپ، جۇلدىزى جاندى. مادەنيەت جانە سپورت ءمينيسترى ارىستانبەك مۇحامەدي ۇلى وسى جەتىستىككە بايلانىستى ءوز كوزقاراسىن ءبىلدىردى. قىتاي تەلەارناسىنىڭ تىلشىسىنە بەرگەن سۇحباتىندا مينيستر ءانشىنىڭ شەبەرلىگىن، ءان ورىنداۋ ەرەكشەلىگىمەن تىڭداۋشىسىن تامساندىرعان دارىن يەسى ەكەندىگىن تىلگە تيەك ەتتى. مينيستر ديماشتىڭ ونەرى ارقىلى قازاقستان مەن قىتايدىڭ مادەني بايلانىستارىنا ۇلكەن سەرپىن بەرە وتىرىپ، ونەر سالاسىنداعى ەكى ەلدىڭ ىنتىماقتاستىعىن العا سۇيرەيتىن ەرەكشە قۇبىلىسقا اينالعاننى اتاپ ءوتتى.
«ول مۋزىكانى ەرەكشە قاستەرلەيتىن جانە سۇيەتىن جان. قولى قالت ەتكەن كەزدە، ول فورتەپيانوعا وتىرىپ، بوي سەرگىتەدى. مۋزىكا قاسيەتتى دۇنيە! ول - ۇلتتار اراسىنداعى بايلانىستىڭ التىن دىڭگەگى ءتارىزدى. ديماش سەكىلدى تارلان تالانت قىتاي مەن قازاقستاننىڭ مادەني بايلانىسىنا كەرەمەت قوزعاۋ سالدى. قىتاي ءتىلى - ەرەكشە ءتىل! ال قىتايدىڭ ءانىن ءبىزدىڭ ديماش قىتاي تىلىندە ورىنداعان كەزدە، ءبىز ەرەكشە شاتتاندىق. سونىمەن بىرگە قاتتى قوبالجىعانىمىز دا راس»، - دەدى ارىستانبەك مۇحامەدي ۇلى سۇحبات بەرە وتىرىپ.
2017 -جىلى قازاقستان مەن قىتايدىڭ ديپلوماتيالىق قاتىناستارىنا 25 جىل تولىپ وتىر. ونىڭ ۇستىنە بيىل قىتايدىڭ قازاقستانداعى تۋريزيم جىلى. الداعى ماۋسىم ايىندا استانادا حالىقارالىق ەكسپو كورمەسى وتەدى. وسى كورمەدە الەمدىك جانە قازاقستاندىق مۋزىكا مادەنيەتىنىڭ قايتالانباس تۋىندىلارى قويىلادى دەپ كۇتىلۋدە. ءمينيستردىڭ سوزىنە قاراعاندا ونىڭ دايىندىعى سوڭعى مارەسىنە جەتىپ قالدى. ديماشتىڭ مۋزىكالىق ونەرى قىتاي ازاماتتارىنىڭ قازاقستانعا كەلۋىنە داڭعىل جول اشادى.
مينيستر ا. مۇحامەدي ۇلى: «قازاقستانعا كەلىپ سۇحبات الۋعا نيەت بىلدىرگەندەرىڭىز ءۇشىن العىسىمدى بىلدىرەمىن. وسىنىڭ بارلىعى ەكى ەل اراسىنداعى مادەني قاتىناستاردىڭ جاڭا بەلەسى بولىپ تابىلادى»، - دەدى.
ديماش ەكسپو- دا ونەر كورسەتەدى دەپ كۇتىلۋدە. ونىڭ حاس شەبەرلىگى الەمدىك قاۋىمداستىقتىڭ استاناداعى كورمەگە دەگەن قىزىعۋشىلىعىن تۋدىرادى.
«ەكى ەلدىڭ قاتىناسى وتە تىعىز. تامىرى تەرەڭدە جاتىر. اسىرەسە مادەنيەت سالاسىندا. ال، ديماش وسىناۋ ارا- قاتىناسقا جان ءبىتىرىپ وتىر»، - دەپ اتاپ ءوتتى مينيستر.
