ۇلى دالا ەلىنىڭ بولاشاعىنا ارنالعان باعدارشام
بۇل ماقالادا ەلباسى جاڭا عاسىردا ءار قازاقستاندىقتىڭ ۋاقىت سىنىنان سۇرىنبەي ءوتۋى ءۇشىن جاڭاشا ويلاۋى، ساناسىن جاڭعىرتۋى جاس مەملەكەتىمىزدىڭ الدىڭعى قاتارلى ەلدەردىڭ قاتارىنا قوسىلۋى ءۇشىن اسا ماڭىزدى فاكتور ەكەندىگىن تەرەڭ پايىمداپ كورسەتەدى»، - دەگەن ويىمەن ءبولىستى شىعىس قازاقستان وبلىستىق ءماسليحاتىنىڭ دەپۋتاتى ريزا مولداشەۆا.
ونىڭ پىكىرىنشە، «قازاق «تۋعان جەرگە تۋىڭدى تىك» دەپ بەكەر ايتپاعان. پاتريوتيزم كىندىك قانىڭ تامعان جەرىڭە، وسكەن اۋىلىڭا، قالاڭ مەن وڭىرىڭە، ياعني تۋعان جەرىڭە دەگەن سۇيىسپەنشىلىكتەن باستالادى. سول سەبەپتى مەن «تۋعان جەر» باعدارلاماسىن قولعا الۋدى ۇسىنامىن»، - دەگەنى جاستاردى پاتريوتتىق رۋحتا تاربيەلەۋ ىسىندە باعا جەتپەس ۇسىنىس.
«اسىرەسە بۇگىنگىدەي شەتەلدەن جۇماق ىزدەپ كەتىپ جاتقان جاستارعا وي سالا وتىرىپ، تۋعان جەر مەن اتا-انا الدىنداعى پارىز بەن قارىزدى وسكەلەڭ ۇرپاقتىڭ ويىنا ءسىڭىرىپ، ساناسىنا سىلكىنىس اكەلەتىن قادام دەپ قابىلدادىم. ەلباسى تۋعان جەر، وسكەن ەل تاقىرىبىنا ماڭىز بەرىپتى.
اتا-بابالارىمىز اق نايزانىڭ ۇشىمەن، اق بىلەكتىڭ كۇشىمەن قورعاپ، بۇگىنگى ۇرپاعىنا امان-ەسەن ساقتاپ جەتكىزگەن اتامەكەنگە ادالدىق يدەياسى دەپ قابىلدادىم. سونىمەن قاتار قازاق ەلىنىڭ ەكونوميكالىق تۇرعىدان باسەكەگە قابىلەتتى بولا ءبىلۋى، ول ءۇشىن ءبىلىم مەن عىلىمدى تەرەڭ مەڭگەرۋ قاجەتتىگى - وقىعان ادامعا وي سالارلىقتاي قۇندىلىق.
ەلىمىز ەگەمەندىگىن العاننان بەرى، لاتىن قارپىنە كوشۋ جايى ۇنەمى ايتىلىپ كەلەدى. ايتىلعان ۇسىنىستار كوپ بولعانىمەن، شەشىمىن تابا الماي جۇرگەن وزەكتى ماسەلەنىڭ بىرىنە ەلباسى سوڭعى نۇكتەنى قويعان سياقتى»، - دەيدى ءماسليحات دەپۋتاتى.
«قازاقستان-2050» ستراتەگياسىندا 2025-جىلدان باستاپ لاتىن الىپبيىنە كوشۋگە كىرىسۋىمىز كەرەكتىگىن مالىمدەگەن ق ر پرەزيدەنتى 2025-جىلعا قاراي ءىس قاعازدارىن، مەرزىمدى باسپا ءسوزدى، وقۋلىقتاردى - ءبارىن دە لاتىن الىپبيىمەن باسىپ شىعارا باستاۋ قاجەتتىگىن ايتىپ تاپسىرمالار بەردى، ناقتى مەجەنى اتادى.
لاتىن الىپبيىنە نەگىزدەلگەن قازاق جازۋى بىزگە كەرەك پە، جوق پا؟ ەگەر كوشە قالساق، بۇل وزگەرىس بىزگە نە بەرەدى دەگەن كوپشىلىكتىڭ كوكەيىندەگى شارىقتاۋ شەگىنە جەتكەن ساۋالعا حالىق جاۋاپ الدى.
بۇل ورايدا ق ر ءبىلىم جانە عىلىم مينيسترلىگىنە ارتىلعان سالماق تا از ەمەس ەكەندىگىن بايقادىق. الايدا بۇل تاۋەلسىز ەلدى بولاشاققا اپاراتىن ءبىلىمدى، پاتريوت ۇرپاق تاربيەلەۋ ىسىنە ەلباسىنىڭ الاڭداۋشىلىعىنان تۋعان ماڭىزدى قۇجات ەكەندىگى داۋسىز»، - دەيدى دەپۋتات.
