ا ق ش- تىڭ نيۋ- يورك شتاتىندا وتباسىلىق جاعدايى تومەن جاستار ەندى تەگىن ءبىلىم الادى

 ءبىراق ولار وقۋ بىتىرگەننەن كەيىن وسى شتاتتا قالىپ، قانشا جىل تەگىن وقىسا سونشا ۋاقىت جۇمىس ىستەۋى ءتيىس. جەرگىلىكتى بيلىكتىڭ جاڭا جوباسى كوپشىلىكتىڭ كوڭىلىنەن شىعىپ وتىر.

ايماق اكىمشىلىگىنىڭ تىڭ جوباسى بيىل كۇزدەن باستاپ قولدانىسقا ەنەدى. وعان سايكەس تەگىن ءبىلىم الۋ باعدارلاماسىنا جىلدىق تابىسى 100 مىڭ دوللاردان اسپايتىن وتباسىنىڭ بالالارى قاتىسا الادى. ال ەكى جىلدان كەيىن بۇل مەجە 125 مىڭعا دەيىن ۇلعايتىلادى. باعدارلاما شتاتتىڭ بيۋدجەتىندە قاراستىرىلىپ قويعان.

ەندريۋ كۋومو، نيۋ- يورك شتاتىنىڭ گۋبەرناتورى:

 - ءبىز ەل اۋماعىندا ءبىرىنشى بولىپ وسىنداي شەشىم قابىلداپ وتىرمىز. وعان شتاتتىڭ 80 پايىز حالقى قاتىسا الادى. وزدەرىڭىز ويلاپ قاراڭىزدارشى قانشاما وتباسى. قازىر باستامانى بىزدەن كورىپ، باسقا ايماقتار دا قولعا الىپ جاتىر.

 نيۋ- يورك قالالىق كوللەدجىنىڭ پرەزيدەنتى ۆينسەنت بۋدرونىڭ ايتۋىنشا، بۇل وقۋ پروتسەسىنە كوپ ادامدى قامتۋعا مۇمكىندىك بەرىپ، ايماقتاعى ەڭبەك نارىعىنا وڭ اسەرىن تيگىزەدى.

 ۆينسەنت بۋدرو، نيۋ- يورك قالالىق كوللەدجىنىڭ پرەزيدەنتى:

 - ادەتتە ستۋدەنتتەر اعا ۇرپاقتان مەملەكەتتىك جوعارى وقۋ ورىندارىندا تەگىن ءبىلىم العانىن ەستيتىن. ءبىراق ول زامان قايتىپ ورالادى دەپ ەشكىم ويلاعان جوق. ەندى مىنە بيلىك جىگەرلى جاستاردى قولداپ، جاڭا ستيپەنديا تاعايىندادى. بۇل دەر كەزىندە قابىلدانعان شەشىم بولدى. ال اتالعان ستيپەنديا جىلىنا 4 جارىم مىڭ دوللار بولاتىن وقۋ اقىسىن تولەۋگە بولىنەدى. ءبىراق ستۋدەنت جاتىن جەرى مەن تاماعىنا جۇمسالاتىن شىعىندى ءوزى وتەۋى ءتيىس. نيۋ- يورك كوللەدجىنىڭ ستۋدەنتى ساميا الي بيلىكتىڭ بۇل قادامىن قۇپتاپ وتىر.

ساميا الي، ستۋدەنت:

- ستۋدەنتتىك نەسيە الىپ، ونى كوللەدجگە تولەگەننەن گورى مىنا باعدارلاما بويىنشا وقۋدى تەگىن ءبىتىرىپ، نيۋ- يوركتە 4 جىل جۇمىس جاساعانىم جاقسى ەمەس پە. جەرگىلىكتى بيلىكتىڭ پايىمداۋىنشا، باعدارلاما العاشقى ءۇش جىلدىڭ ىشىندە 200 مىڭ ستۋدەنتتى قامتيدى. شتات اكىمشىلىگى جوبا اسىرەسە تۇرمىسى تومەن وتباسىلارعا ءتيىمدى دەيدى.

www.24.kz