اقساقالى ونەگەلى اۋىلدىڭ ورەنى تاربيەلى
استانا. قازاقپارات - ونەگەلى اقساقالدارىمىز باردا ۇلتتىق ونەگەمىز بەن تاربيەمىز تۇلەي بەرمەك. وعان مىسال رەتىندە وڭتۇستىك قازاقستاندا كوپكە ۇلگى بولعان جۋسانساي اۋىلىن ايتۋعا بولادى. مۇنداعى تۇرعىندار زيان ادەتتەرگە مۇلدەم جۋىمايدى.
اراق- شاراپ پەن سىرا ىشپەيدى، تەمەكى دە تارتپايدى. سەبەبى ولار 8 جىلدان بەرى سالاۋاتتى ءومىر سالتىن ۇستانىپ ءجۇر. جاسىنان باستاپ، قارياسىنا دەيىن تەنتەك سۋدى اۋىزدارىنا تاتىپ المايدى.
سونىڭ ارقاسىندا ەلدە ۇرىس- كەرىس جوق. قايتا بەرەكە بار. قۇقىق قورعاۋ ورگاندارىنىڭ مالىمەتىنشە، بۇگىنگە دەيىن ەلدى مەكەندە ءبىر دە ءبىر قىلمىس تىركەلمەپتى. ءتىلشىمىز نۇربەك بايبوسىن تارتىپكە باس يگەن ۇلگىلى اۋىل جۇرتشىلىعىمەن جۇزدەسىپ قايتتى.
جۋسانساي اۋىلىندا 3 دۇكەن بار. ازىق- تۇلىكتەن باستاپ تۇرمىسقا قاجەتتى زاتتىڭ بارلىعى ساتىلادى. ءبىراق ەشبىرىندە سپيرتتى ىشىمدىك پەن تەمەكى جوق. كاسىپكەر الكوگولدىك ءونىم ساۋداسىنان باس تارتقان.
قارلىعاش ەلتاي، دۇكەنشى:
-5-10 تەڭگەنىڭ سوڭىنان قۋماستان، ءبارىن تيىپ تاستادىم. اراق، تەمەكى، ناسىباي بىزدە ساتىلمايدى. ادالىمەن تابىلعان اقشا بويىڭا قۋات بەرە مە، بەرەكەلى بولادى ەكەن ءسوزدىڭ شىنى كەرەك.
ارىس وزەنىن جاعالاي قونىستانعان جۋسانسايلىقتاردىڭ نەگىزگى كۇنكورىسى - ەگىنشىلىك. كوكتەم شىققان كەزدە اۋىلدا ەڭبەك قىزادى. كوشەدە بوس جۇرگەن ادامدى كورمەيسىز.
ىزەتبەك تازابەك ۇلى، شارۋا:
- كەرەك نارسەلەردىڭ بارلىعى مال مەن ەگىستىكتەن تابىلادى. بوس جۇرگەن ادام جوق. جۇمىسسىز ادام جوق. ءتىپتى ەگىس ناۋقانى كەزىندە ادام جالدايمىز. اۋىلدا 100-گە تارتا ءۇي بار. كوبىنىڭ تۇرمىسى جاقسى.
مۇندا اقساقالدار كەڭەسى بەرەكەلى تىرلىكتىڭ ۇيىتقىسىنا اينالعان. ولار ءتارتىپ پەن ءداستۇر ساباقتاستىعىنىڭ ساقتالۋىنا اتسالىسىپ وتىر. كوپشىلىككە ورتاق يگى ىستەرگە باستاماشى دا وزدەرى بولىپ ءجۇر. ءبىر عانا مىسال: وسى اۋىلدان تۇلەپ ۇشقان ىسكەر ازاماتتار جۋسانسايداعى كوپىردى جوندەۋدى باستاپ كەتىپتى.
ءابدۋالى ەركىنبەك ۇلى، اۋىل ءبيى:
- اۋىل ازاماتتارى كوپىرلەردى جاڭالاپ جاتىر. ونىڭ ءوزى ۇلتىمىزدىڭ ءبىر- بىرىنە دەگەن قامقورلىعى، ەكىنشى جاعىنان تۋعان جەرىنە دەگەن جاناشىرلىعى بولىپ تابىلادى.
بەلسەندى ازاماتتار اۋىلدىڭ ورتالىق كوشەلەرىنە اسفالت توسەتىپ، جارىق جۇرگىزدىرىپ قويعان. مۇندا مەشىت تە بار. بىرلىگى بەكەم، تىرلىگى ءتۇزۋ بۇل اۋىلدىڭ جاستارى ءتارتىپتى. سوڭعى مۇندا 7 جىلدا ءبىر دە ءبىر قىلمىس تىركەلمەپتى. ال وسكەلەڭ ۇرپاق وسىنداي ونەگەلى اۋىلدا تۋىپ- وسكەندەرىن ماقتان تۇتادى.
www.khabar.kz
