جاڭبىر شاقىرۋشى
استانا. قازاقپارات - ءبىر توڭىرەكتە ءتورت ايدان بەرى جاۋىن جاۋماعان بولاتىن. ەگىن بولسا، قۋراپ بارا جاتىر. ەلگە اشارشىلىق قاۋپى ءتونىپ تۇر.
وسى ماڭايداعى ءۇش اۋىلدىڭ تۇرعىندارى سوڭعى اقشالارىن شىعارىپ، ارنايى جاڭبىر شاقىرۋشى، ءبىر كىشكەنتاي عانا ارىق شالدى الدىرتتى. شال باسپانا رەتىندە اۋىل شەتىندەگى ءبىر لاشىقتى تاڭدادى جانە كۇنىنە ءبىر رەت ىستىق تاماق سۇرادى. العاشقى ەكى كۇندە ەش وزگەرىس بولمادى. جينالعان جۇرت ريزا بولماستان كۇڭكىلدەي باستادى. تەك ءۇشىنشى كۇنى بارىپ جاڭبىر جاۋدى. شال وزىنە ءتيىستى كوپ اقشانى الىپ، كەرى قايتۋعا جينالا باستادى. كوپ ادام ونىڭ جاڭبىردى قالاي جاۋدىرعانىن بىلمەك بولدى. جەرگىلىكتى تۇرعىندار جينالىپ الىپ، ۋاقىت جىبەرمەستەن، شالدان جاڭبىردى قالاي شاقىرعانىن سۇراي باستادى.
- ءاسىلى جاڭبىر شاقىراتىن ارنايى دۇعا بار بولار؟ ول اتادان بالاعا مۇرا بولىپ قالاتىن شىعار؟ - دەدى ولار. - ەستەرىڭ دۇرىس پا؟ - دەدى شال اشۋلانىپ.
- مەن بە ەكەن وسى جاۋىندى شاقىرعان؟ مەن نە، سەندەرگە سيقىرشىمىن با؟ سەندەر مەن قارابەتتى سونداي ۇلى تابيعي قۇبىلىستى شاقىرا الادى دەپ ويلايسىڭدار ما؟
- سوندا ءسىز نە ىستەدىڭىز؟ - دەدى تاڭعالعان شارۋالار.
- ەندى جاڭبىردىڭ جاۋىپ تۇرعانى راس قوي.
- ەشكىم دە ەش نارسەنى وزگەرتە المايدى، - دەدى شال، سۇق ساۋساعىن جوعارى كوتەرىپ.
- ءبىراق ءاربىر ادام ءوزىن وزگەرتە الادى. مەن سەندەرگە وتىرىك ايتپاي- اق قويايىن، وسى جولدا ءبىراز توبەلەرگە شىقتىم. سونداي ءبىر تەپە- تەڭدىككە جەتكەن مەن وسى اۋىلعا كەلىپ، مۇندا كوپ نارسەنىڭ قالىپتى جاعدايدان اۋىپ كەتكەنىن بايقادىم. استىق قۋراۋدا. ادامدار نە ىستەرىن بىلمەي سەندەلۋدە. ونى وزگەرتۋگە مەنىڭ شامام كەلمەيدى. قولىمنان كەلەتىنى تەك ءوزىمدى وزگەرتۋ عانا. سول ءۇشىن تەپە- تەڭدىكتى بۇزىپ، تەرىس جولعا ءتۇسىپ، وسى اۋىلدىڭ ادامدارى سەكىلدى بولۋىم كەرەك بولدى. مەن سونداي بولا ءبىلدىم. - سوسىن؟ جاڭبىر جاۋدى عوي. - سوسىن مەن ەڭبەكتەنىپ، ءوزىمدى قايتادان تەپە- تەڭدىك جاعدايىنا الىپ كەلدىم. مەن وسى اۋىلدىڭ ادامدارىمەن بىردەي دەڭگەيگە تومەندەپ، قايتادان جاقسارا باستاعانىمنان كەيىن بىرتە- بىرتە ءبارى ءوز ورنىنا كەلدى. ەندى بۇل جەردى قوپسىتۋ كەرەك بولدى. سوندىقتان جاڭبىر جاۋدى. ءبىراق ول مەن "شاقىرعاننان" كەلگەن جوق.
- ەگەر ايتقانىڭىزدىڭ ءبارى سونشالىقتى قاراپايىم بولاتىن بولسا، وندا نەگە مىنا كوپ اقشانى يەمدەنىپ الىپ بارا جاتىرسىز؟ شارۋالار وسى سىزگە تولەيتىن اقشا ءۇشىن ۇستەرىندەگى جالعىز كويلەكتەرىنە دەيىن ساتۋعا ءماجبۇر بولدى عوي.
- سەبەبى مەن كارى ءارى ءالسىز شالمىن. تەپە- تەڭدىكتەن شىققان ساتتە مەنىڭ دەنساۋلىعىم اينالامداعى الەمدەي قاتتى ناشارلايدى. ءوز ەركىڭمەن دۇرىس حالدەن قيسىق حالگە ءتۇسۋ وڭاي ەمەس. ءسويتىپ جاڭبىر شاقىرۋشى شال اڭگىمەنىڭ بىتكەنىن سەزدىرتتى.
Massaget.kz