اشىمبايەۆ: لاتىن الىپبيىنە كوشۋ قازاقستاننىڭ ۇلتتىق مۇددەسىنە ساي

استانا. قازاقپارات - قازاق ءتىلىن لاتىن الىپبيىنە كوشىرۋ وتە دۇرىس قادام. بۇگىن پارلامەنت ماجىلىسىندەگى جالپى وتىرىستان كەيىن دەپۋتات ماۋلەن اشىمبايەۆ وسىلاي ءمالىم ەتتى، دەپ حابارلايدى قازاقپارات.

 «قازاق ءتىلىن لاتىن الىپبيىنە كوشىرۋ ماسەلەسى ءبىرىنشى رەت كوتەرىلىپ وتىرعان جوق. ەلباسىنىڭ بىرنەشە جىل بۇرىنعى جولداۋىندا بۇل تاقىرىپ ناقتى اتاپ كورسەتىلگەن ەدى. مەنىڭ ويىمشا، بۇل دۇرىس قادام، سونداي- اق ەلىمىز ءۇشىن ۇدەمەلى ىلگەرىلەۋشىلىكتىڭ قادامى. ءبىز بەلگىلى ءبىر وتپەلى كەزەڭ قاجەت بولاتىنىن، ءتيىستى قيىندىقتار تۋىنداۋى مۇمكىن ەكەنىن ءتۇسىنۋىمىز كەرەك. بۇل تۇرعىدا حالىقتى دايارلاۋعا، ءتۇسىندىرۋ جۇمىستارىن جۇرگىزۋگە قاجەتتى عىلىمي جۇمىستارعا بايلانىستى شارالار قامتىلاتىنى انىق. ستراتەگيالىق پەرسپەكتيۆادا لاتىن الىپبيىنە كوشۋ ەلىمىز ءۇشىن دۇرىس قادام دەپ پايىمدايمىن، سەبەبى ول ءبىزدىڭ مەملەكەتتىڭ ۇلتتىق مۇددەسىنە ساي كەلەدى» ، - دەپ ءتۇسىندىردى دەپۋتات.

ونىڭ سوزىنە قاراعاندا، بۇگىندە ەكونوميكالىق احۋال تۇراقتالىپ كەلە جاتقاندىقتان، كونستيتۋتسيالىق رەفورمادان سوڭ قازاقستاننىڭ ۇزاق مەرزىمدى مۇددەلەرىن قامتاماسىز ەتۋگە باعىتتالعان قانداي دا ءبىر ستراتەگيالىق قادامداردى ىسكە اسىرۋ قاجەت.

م. اشىمبايەۆتىڭ پايىمىنشا، زاڭنامالىق باعىتتا ماڭىزدى جۇمىستاردان كەيىن مەملەكەت باسشىسى وسىنداي باستامانى جاريالادى.

 «مەن بۇل شەشىمدى قولدايمىن. لاتىنعا كوشۋ شارالارى كەزەڭ- كەزەڭمەن ءجۇرۋى ءتيىس. وسى ورايدا مەملەكەتتىك ورگاندار بۇل باعىتتاعى پروتسەستى لايىقتى دەڭگەيدە، ياعني جوسپارلى نەگىزدە ىسكە اسىرۋى قاجەت. اتاپ ايتقاندا، الدا اتقارىلاتىن شارالار اياسىندا ۇكىمەت ساۋاتتى باعدارلامانى قۇرۋى ءتيىس. ءتۇسىندىرۋ جۇمىستارى، كەڭەستەردى بايىپپەن جۇرگىزۋ كەرەك. وسىدان كەيىن بىرتىندەپ لاتىن الىپبيىنە كوشىرۋدى ىسكە اسىرۋعا بولادى» ، - دەپ تۇيىندەدى ءسوزىن دەپۋتات.

 ايتا كەتەيىك، ق ر پرەزيدەنتى نۇرسۇلتان نازاربايەۆ «ەگەمەن قازاقستان» گازەتىنە شىققان ماقالاسىندا لاتىن الىپبيىنە كوشۋدىڭ ناقتى كەستەسىن ازىرلەۋدى تاپسىرعان بولاتىن.

ەلباسى 2017 -جىلدىڭ اياعىنا دەيىن عالىمداردىڭ كومەگىمەن، بارشا قوعام وكىلدەرىمەن اقىلداسا وتىرىپ، قازاق ءالىپبيىنىڭ جاڭا گرافيكاداعى ءبىرىڭعاي ستاندارتتى نۇسقاسىن قابىلداۋ كەرەكتىگىن دە جەتكىزدى. ال 2018 -جىلدان باستاپ جاڭا ءالىپبيدى ۇيرەتەتىن مامانداردى جانە ورتا مەكتەپتەرگە ارنالعان وقۋلىقتاردى دايىنداۋعا كىرىسكەن دۇرىس دەپ سانايدى.

 

اۆتور: رۋسلان عابباسوۆ