ءدىن تانۋشى: مەشىتتە توي جاساعان قاراقاتتى ايايمىن

ول وتاندىق شوۋ-بيزنەس وكىلدەرىن گولليۆۋد جۇلدىزدارىمەن سالىستىرا وتىرىپ، قازاقستاندىق ارتىستەردىڭ رۋحاني جاعىنان وتە تومەن دەڭگەيدە ەكەنىن ايتتى.

«رەزونانس» باسىلىمىنا بەرگەن پىكىرىندە ول انشىگە ايانىشپەن قارايتىنىن جەتكىزدى.

«قازىر بارلىعى ءانشى قاراقاتتىڭ ورتالىق مەشىت قابىرعاسىندا وتكىزگەن تۋعان كۇنىنە وراي وتكىزگەن ساۋىق كەشىن قىزۋ تالقىلاۋدا. ادامداردىڭ تاڭدانىسىنا تاڭىرقاپ وتىرمىن. ارتىستەردىڭ مۇنداي ەركەلىكتەرىنە ۇيرەنەتىن ۋاقىت جەتكەن سىڭايلى، ولارعا كوز جۇما قاراۋ كەرەك. ارتىستەردەن نە سۇرايسىڭ؟ مەنىڭ كوزقاراسىمدا ولار بالا سياقتى جانە وسى كەيىپتە ماڭگىلىككە قالاتىنداي. رۋحاني ەرگەجەيلىلەردىڭ ناق ءوزى.

ءبىزدىڭ ارتىستەر انجەلينا دجولي، برەد پيتت نەمەسە لەوناردو دي كاپريونىڭ دەڭگەيىنە جەتە المايدى. وتاندىق جۇلدىزداردىڭ قايىرىمدى ءىسىن مىسالعا كەلتىرە الاسىز با؟ ولاردىڭ قايسىسى جەتىم بالانى اسىراپ الدى؟ نەمەسە ءوز قالتاسىنان اقشا شىعارىپ، ولارعا ءۇي سالىپ بەرگەنى بار ما؟ بانكيرلەر مەن وليگارحتاردىڭ، ءتىپتى قاراقشىلاردىڭ مەشىت سالعان كەزىن بىلەمىن. الايدا شوۋ-بيزنەس وكىلىنەن مۇندايدى ەستىمەدىم. بالكىم قايىرىمدىلىقپەن اينالىساتىنداي ولار جەتكىلىكتى دارەجەدە باقۋاتتى ەمەس شىعار.

ارتىستەر اراسىندا تەك شىعارماشىلىقتا ەمەس، كۇندەلىكتى ومىردە ۇلىلىق تانىتاتىندار بار. بۇل ءبىر-بىرىمەن تىعىز بايلانىستى. نەگە ەكەنىن بىلمەيمىن، ونداي قادامعا ديماش قۇدايبەرگەنوۆ باراتىنداي كورىنەدى. باسقا كىم؟ بۇعان جاۋاپ بەرە المايمىن.

ەگەر قاراقات جەتىم بالانىڭ تۋعان كۇنىن مەشىتتە جاساپ بەرسە، ەل تامسانار ەدى. ءبىراق ول ءۇشىن كەم دەگەندە انجەلينا دجوليدىڭ شاش ۇلگىسى نەمەسە ءجۇرىسى بولۋ كەرەك شىعار. نەمەسە اعىلشىن ءتىلىن مەڭگەرۋ كەرەك شىعار.

مەشىت قابىرعاسىندا دۇركىرەتىپ توي جاساعان بۇل ءانشىنى ايايمىن. مەنىڭشە، ول ءبىرىنشى كەزەكتى ءوز اتا-اناسىنىڭ اتىنا كىر كەلتىردى. سەبەبى ىسىنە قاراپ ول وتباسىندا دۇرىس تاربيە كورمەگەن دەگەن ويعا قالاسىڭ.

ال مەشىت باسشىلىعىنا كەلسەك، يمامداردى دا تۇسىنۋگە بولادى. ءبىزدىڭ رۋحاني وردامىز الدەقاشان كوممەرتسيالىق مەكەمەگە اينالىپ كەتكەن. ولاردى ايىپتاۋدان اۋلاقپىن. سەبەبى مۇنى قالىپتى جاعداي رەتىندە كورىپ ۇيرەنىپ قالدىم. كوپتەگەن مەشىتتەردە كوممەرتسيالىق ساۋنالار مەن ماسساج سالوندارى جۇمىس ىستەسە دە تاڭعالمايمىن»، - دەيدى مۇرات تەلىبەكوۆ.

ەستە بولسا، بۇعان دەيىن قاراقات ءابىلدينانىڭ مەشىتتە وتكەن كەشى جايىندا جازعان ەدىك.