ۇلى بريتانيادان قىتايعا العاشقى جۇك پويىزى جولعا شىقتى

بالالارعا ارنالعان تاۋارلار، ۆيسكي مەن ءدارى- دارمەك سياقتى تاۋارلار تيەلگەن پويىز ءۇش اپتاعا جۋىق ۋاقىت جول ءجۇرىپ، 12 مىڭ كيلومەترگە جۋىق جولدى باسىپ ءوتتى. ءۇش اپتا - تاۋاردى تەڭىز جولىمەن كەمەمەن جىبەرۋگە كەتەتىن ۋاقىتتان ەكى ەسەگە از. ەۋروپا وداعى قۇرامىنان شىعۋعا دايىندالىپ جاتقان لوندون بۇدان ارى جۇك پويىزدارىن قيىر شىعىسقا تۇراقتى تۇردە جونەلتىپ تۇرۋدان ءۇمىتتى.

قىتايدان ۇلى بريتانياعا جۇك تاسىمالداعان العاشقى پويىز لوندونعا قاڭتاردا بارعان. پويىز نەگىزىنەن كيىم- كەشەك پەن باسقا دا تاۋارلار جەتكىزگەن.

اشىق قىزىل ءتۇستى پويىز قۇرامى Yiwu Timex Industrial Investment كومپانياسىنىڭ قاراۋىندا جانە ول قىتاي پرەزيدەنتى شي جينپيڭنىڭ «ءبىر بەلدەۋ، ءبىر جول» باستاماسىن جۇزەگە اسىرۋدىڭ ءبىر بولىگى سانالادى. لوندون ەۋروپانىڭ قىتايمەن تىكەلەي تەمىرجول قاتىناسىن ورناتقان 15-قالاسى سانالادى.

پويىز مارشرۋتى فرانسيا، بەلگيا، گەرمانيا، پولشا، بەلارۋس، رەسەي جانە قازاقستان ارقىلى وتەدى. فرانسيادان لوندونعا باراتىن جولدىڭ ءبىر بولىگى لا- مانش بۇعازى استىنداعى توننەلمەن وتەدى.

بەلارۋسپەن شەكارادا پويىزدىڭ 32 كونتەينەرى ارى قارايعى جولدا بۇرىنعى سوۆەت رەسپۋبليكالارىنداعى كەڭ تاباندى تەمىرجولمەن ءجۇرۋ ءۇشىن باسقا پلاتفورمالارعا اۋىستىرىلادى.

http://www.azattyq.org