روزا رىمبايەۆا: ديماش ەلىمىزدىڭ سۇيىكتى ءانشىسى اتانۋىنا مۇمكىندىگى از. ويتكەنى

استانا. قازاقپارات - قازاقستاننىڭ حالىق ءارتىسى روزا رىمبايەۆا «جۇلدىزدار وتباسى» جۇرنالىنا بەرگەن سۇحباتىندا وتاندىق تەلەارنالاردى جەردەن الىپ، جەرگە سالىپتى.

ءانشى باسىلىمنىڭ «ديماش قازاق ونەرىن الەمگە تانىتا الا ما» دەگەن ساۋالىنا بارىنشا بايىپتى جاۋاپ بەرگەن ەكەن.

- بۇل تۋرالى كەسىپ-ءپىشىپ بولجام ايتۋ قيىن. ويتكەنى، بولاشاقتا نە بولارىن بىلمەيمىز. ءبىر انىعى، ديماشتىڭ ەلىمىزدە حالىقتىڭ سۇيىكتى ءانشىسى اتانۋىنا مۇمكىندىك از.

سەبەبى، ءبىزدىڭ تەلەۆيزيالىق جوبالاردىڭ بارلىعى تويدىڭ انشىلەرىن عانا ناسيحاتتايدى. سولاردى ماقتاپ، سولاردى كوككە كوتەرەدى. جوعارى دەڭگەيدەگى شىن تالانتتاردى كورسەتەتىن تەلەۆيزيالىق جوبالار جوقتىڭ قاسى.

وتاندىق تەلەارنالار «تويدۋمان»، «تويبازار»، «تويباستار» سەكىلدى تويدىڭ باعدارلامالارىنان ارى اسا المايدى. الدىمەن ەكرانىمىزدى وسىنداي ماعىناسىز شوۋلاردان تازالاپ، ديماش سەكىلدى تالانتتىلاردىڭ ونەرىن دارىپتەپ، جاستارعا ۇلگى ەتۋىمىز كەرەك، -  دەپتى روزا رىمبايەۆا.