بيىل قازاقستاندا قانداي جولدار اقىلى جۇيەگە ەنەدى؟

استانا. قازاقپارات - ق ر ينۆەستيتسيالار جانە دامۋ ءمينيسترى جەڭىس قاسىمبەك اعىمداعى جىلى قازاقستاندا اقىلى جۇيەگە اۋىساتىن جولدار تۋرالى ايتتى، دەپ حابارلايدى قازاقپارات.

«جوبالاردىڭ اياقتالۋىنا قاراي كەزەڭ-كەزەڭمەن جولدارعا اقىلى جۇيەنى ەنگىزۋ ەسكەرىلگەن. وسى ورايدا جولداردى كۇتىپ ۇستاۋ قامتاماسىز ەتىلىپ، بيۋدجەتكە جۇكتەمەنى تومەندەتەدى. «نۇرلى جول» باعدارلاماسى اياسىندا 2020-جىلعا قاراي اقىلى جۇيە 6 مىڭ شاقىرىمعا، ال كەيىننەن 7 مىڭ شاقىرىمعا دەيىن ەنگىزىلەدى. اعىمداعى جىلدىڭ جەلتوقسانىندا «استانا- تەمىرتاۋ»، «الماتى-قاپشاعاي»، «الماتى-قورعاس» ۋچاسكەلەرىندە تولەم جاساۋ جۇيەسى ىسكە قوسىلادى. وسى جولداردىڭ جالپى قاشىقتىعى 500 شاقىرىمعا جۋىق»، - دەدى مينيستر ماجىلىستەگى ۇكىمەت ساعاتى بارىسىندا.

وسى ورايدا استانا مەن بۋراباي ارالىعىندا اقىلى جۇيە بىرنەشە جىلدان بەرى جۇمىس ىستەپ تۇرعانىن ەسكە سالىپ وتكەن ج. قاسىمبەك بۇگىندە بۇل جولدا جينالاتىن قارجى اۆتوباندى كۇتىپ ۇستاۋعا جەتكىلىكتى بولىپ وتىرعاندىعىن ايتتى.

«تاريف قۇنى وزگەرگەن جوق، ياعني جەڭىل اۆتوكولىك ءۇشىن شاقىرىمىنا 1 تەڭگە، ال جۇك كولىكتەرىنە 6 دان 10 تەڭگەگە دەيىن. وسى رەتتە بيۋدجەتتىك قارجىلاندىرۋسىز جولدىڭ ساپالى دەڭگەيىن ساقتاۋعا مۇمكىندىك بار. 2022-جىلعا دەيىن 7 مىڭ شاقىرىم جولدى اقىلى ەتكەننەن كەيىن، بارلىق جولداردى رەسپۋبليكالىق بيۋدجەتتىڭ قاتىسۋىنسىز كۇتىپ ۇستاي الامىز دەپ پايىمدايمىز»، - دەدى مينيستر.

بۇدان بۇرىن حابارلانعانداي، 2016-جىلى استانا مەن بۋراباي ارالىعىنداعى اقىلى جولدا جينالعان قارجىنىڭ كولەمى 1 ميلليارد 251 ميلليون تەڭگەنى قۇرادى.

اۆتور: رۋسلان عابباسوۆ