قازاقستاندا توميريس پاتشايىم تۋرالى فيلمدى ءتۇسىرۋ جۇمىستارى باستالدى
فيلم ق ر مادەنيەت جانە سپورت مينيسترلىگىنىڭ تاپسىرىسىمەن ءتۇسىرىلىپ جاتىر. باس پروديۋسەرى - ءاليا نازاربايەۆا («اناعا اپارار جول»). فيلمنىڭ قويۋشى رەجيسسەرى - اقان ساتايەۆ («رەكەتير»، «اداسقان»، «ليكۆيداتور»، «جاۋجۇرەك مىڭ بالا»، «اناعا اپارار جول»). «قازاق فيلم» كينوستۋدياسىنىڭ اقپاراتىنا سايكەس، كارتينا ءبىزدىڭ داۋىرىمىزگە دەيىنگى VI عاسىرداعى وقيعالار جايىندا سىر شەرتەدى. ول كەزەڭدە ساق تايپالارى ۇلى دالانى جاۋلاپ الۋعا كەلگەن پارسى پاتشاسى 2 كيرگە ويسىراتا تويتارىس بەرەدى. ساق اسكەرىنىڭ قولباسشىسى ماسساگەتتەردىڭ پاتشايىمى تۇمار (توميريس) بولدى. «بۇل شايقاس، مەنىڭشە، حالىقتار اراسىنداعى ەڭ سۇراپىل سوعىس بولدى»، - دەپ جازدى ەجەلگى گرەك تاريحشىسى گەرودوت.
فيلم سەناريىن ازىرلەگەن كەزدە ونىڭ ەڭبەكتەرى دە پايدالانىلادى. «توميريس پاتشايىم تۋرالى فيلم ءتۇسىرۋ - ءاليا نۇرسۇلتان قىزىنىڭ يدەياسى. مەن جانە ءبىزدىڭ كوماندا «اناعا اپارار جول» جوباسىندا بىرگە تابىستى جۇمىس ىستەگەننەن كەيىن، قۋانىشپەن ءارى ۇلكەن جاۋاپكەرشىلىكپەن كەزەكتى بىرلەسكەن اۋقىمدى جوبانى ىسكە اسىرۋعا كىرىسىپ جاتىرمىز. قازىر بىزدە دايىندىق جۇمىستارى ءجۇرىپ جاتىر: سەناري جازۋ، ازىرلەۋ، جوبا ءوندىرىسىن جوسپارلاۋ، ءتۇسىرۋ توبىن، عالىم-كونسۋلتانتتار ءتىزىمىن قالىپتاستىرۋ، تاريحي ماتەريالداردى زەردەلەۋ، لوكاتسيانى الدىن الا تاڭداۋ»، - دەدى رەجيسسەر اقان ساتايەۆ.
رەجيسسەر جالپى رەسپۋبليكالىق كاستينگ جاريالاناتىنىن ايتتى. بارلىق اكتەرلەر ءتۇسىرىلىم الدىندا اتقا مىنۋگە، ساداق اتۋعا جانە باسقا دا اسكەري داعدىلارعا ۇيرەتىلەدى. ءتۇسىرىلىم 2017-جىلعى قازاندا باستالادى. 2018-جىلعى اقپانعا دەيىن قازاقستان اۋماعىندا وتەدى. سەناري اۆتورلارى - ءاليا نازاربايەۆا، تيمۋر جاقسىلىقوۆ. بۇدان باسقا، ءتۇسىرىلىم پروتسەسىنە ەلدىڭ بارلىق جەتەكشى شىعارماشىلىق كۇشتەرى تارتىلىپ، شەتەلدىك ماماندار (سكريپت-دوكتورلار، كومپيۋتەرلىك گرافيكا سالاسىنداعى ماماندار) شاقىرتىلدى.
فيلم رەجيسسەرى اقان ساتايەۆ پاتشايىم تۋرالى كينوكارتينا حالىقارالىق كورەرمەننىڭ دە ۇلكەن قىزىعۋشىلىعىنا يە بولاتىنىن اتاپ ءوتتى. قازاقستاندىق پرەمەرا 2018-جىلعى جەلتوقسانعا جوسپارلاندى.
