قازاقستان تۋريزم سالاسى بويىنشا الەمدىك باسەكەگە قابىلەتتىلىك رەيتينگىندە العا جىلجىدى

استانا. قازاقپارات - قازاقستان تۋريزم سالاسى بويىنشا الەمدىك باسەكەگە قابىلەتتىلىك يندەكسىندە ءوز پوزيتسياسىن جاقسارتتى، دەپ حابارلايدى «قازاقپارات» ح ا ا ءتىلشىسى ق ر م س م تۋريزم يندۋسترياسى كوميتەتىنىڭ باسشىسى مارات يعاليعا سىلتەمە جاساپ.

«قازاقستان تۋريزم سالاسى بويىنشا الەمدىك باسەكەگە قابىلەتتىلىك يندەكسىندە ءوز پوزيتسياسىن جاقسارتتى. ەرەكشە اتاپ وتەيىن، ەلىمىز باعانىڭ باسەكەگە قابىلەتتىلىگى بويىنشا الەمنىڭ 136 مەملەكەتىنىڭ ىشىنەن 8-ورىندى يەلەندى. بۇكىل الەمدىك ەكونوميكالىق فورۋمنىڭ دەرەگى بويىنشا، قازاقستان ءوز پوزيتسياسىن 4- ورىنعا العا جىلجىتىپ، تۋريزم سالاسى بويىنشا الەمدىك باسەكەگە قابىلەتتىلىك يندەكسىندە 81-ورىندا تۇر»، - دەپ جازدى يعاليەۆ الەۋمەتتىك جەلىدە.

ونىڭ اقپاراتى بويىنشا، رەيتينگ 2007-جىلدان بەرى ەكى جىلدا ءبىر رەت جاريالانادى. 2017-جىلى وعان تۋريستەردى قابىلداۋعا بايلانىستى 14 پوزيتسياعا ساي كەلەتىن 136 ەل قاتىستى.

«بۇعان تاريحي جانە مادەني مۇرالار، ەكونوميكا، كولىك، قوناق ءۇي سەكتورى، كوممۋنيكاتسيا، مەديتسينانىڭ دامۋى، تۋريزم، سالاسى ءۇشىن قولايلى مەملەكەتتىك ساياسات جانە تاعى باسقالارى كىرەدى. 2015-جىلى قازاقستان بۇل رەيتينگتە 3- ورىنعا كوتەرىلىپ، 85-ورىندى يەلەندى. 2017-جىلى ەلىمىز ءوز پوزيتسياسىن جاقسارتىپ، ءتورت ورىنعا العا جىلجىدى»، - دەپ ءتۇسىندىردى مارات يعاليەۆ.

پوستكەڭەستىك ەلدەردىڭ اراسىندا ەڭ ۇزدىگى - ەستونيا (37-ورىن)، ەكىنشى ورىندا رەسەي تۇر. ءۇشىنشى ورىنعا لاتۆيا (54-ورىن)، ءتورتىنشى - ليتۆا (56-ورىن)، بەسىنشى - گرۋزيا (70-ورىن)، التىنشى - ازەربايجان (71-ورىن)، جەتىنشى - قازاقستان (81-ورىن)، سەگىزىنشى - ۋكراينا (88-ورىن)، توعىزىنشى - تاجىكستان (107-ورىن)، ونىنشى - قىرعىزستان (115-ورىن) جايعاسقان.