تەمىرتاۋ پوليتسياسى حالىقتى لاڭكەستىككە شاقىرعان التى ادامعا ىزدەۋ جاريالادى

قاراعاندى. قازاقپارات - تەمىرتاۋدا لاڭكەستىك توپ قۇرىپ، قالا تۇرعىندارىن سوعىس ءجۇرىپ جاتقان اسكەري نۇكتەلەرگە اتتاندىرۋعا جاپپاي ۇگىتتەگەن التى ادامعا حالىقارالىق ىزدەۋ جاريالاندى،

 دەپ حابارلايدى «قازاقپارات» ح ا ا ءتىلشىسى.

 «ىزدەۋ سالىنعان بارلىق التى ادام - قىلمىسكەرلەر. ولار لاڭكەستىك باعىتتاعى قىلمىستارعا قاتىسى بار تۇلعالار رەتىندە ىشكى ىستەر ورگاندارىندا ەسەپتە تۇر»، - دەپ حابارلادى تەمىرتاۋ ءى ءى ب پوليتسياسىنىڭ شىعىس ءبولىمى.

 پوليتسيا التى ىزدەلۋشى جايلى اقپارات بەرگەندەرگە سىياقى تاعايىنداپ، قۇپيانى ساقتاۋعا ۋادە بەرىپ وتىر. كۇدىكتىلەر 23 پەن 33 جاس ارالىعىنداعى ەر ادامدار. تەرگەۋ نۇسقاسى بويىنشا، 1993 -جىلى تۋعان ءامىرجانوۆ داۋلەتحان مۇراتدين ۇلى جانە 1994 -جىلى تۋعان كوسترۋب دميتري يگوريەۆيچ لاڭكەستىك توپ قۇرىپ، جەتەكشىلىك ەتكەن. ولار ق ر ق ك 257-بابى - «تەرروريستىك توپ قۇرۋ، وعان باسشىلىق ەتۋ جانە ونىڭ ارەكەتىنە قاتىسۋ» بويىنشا ايىپتالىپ وتىر. قالعان تورتەۋى حالىقتى ۇگىتتەۋمەن اينالىسقان - تەمىرتاۋداعى جاس جىگىتتەرمەن سويلەسىپ، لاڭكەستىك توپتاردىڭ سودىرلار قاتارىنا قوسىلۋعا، سوعىس ءجۇرىپ جاتقان ەلدەرگە كەتۋگە شاقىرعان.

 ءتورت كۇدىكتى - 1993 -جىلى تۋعان اباۋوۆ ۇلاعات امان ۇلىنا، 1989 -جىلى تۋعان ارچاكوۆ ماگومەد ماگومەد ۇلىنا جانە 1984 -جىلى تۋعان راحمەتوۆ ديدار ميرجان ۇلى مەن 1992 -جىلى تۋعان راحمەتوۆ دياس ميرجان ۇلىنا ق ر ق ك 259-بابى - «تەرروريستىك نە ەكسترەميستىك ارەكەتتى ۇيىمداستىرۋ ماقساتىندا ادامداردى ازعىرىپ كوندىرۋ نەمەسە دايارلاۋ نە قارۋلاندىرۋ» بويىنشا قىلمىس جاسادى دەگەن ايىپ تاعىلدى.