ماسكەۋدە قازاق مادەنيەتىنىڭ كۇنى وتكىزىلدى - فوتو
مادەني شارانى قازاق مادەنيەتىنىڭ قوعامدىق بىرلەستىكتەرى، قازاق ستۋدەنتتەرى جانە رەسەيدەگى قازاق دياسپوراسىنىڭ ۇيىمدارى قالالىق مەكەمەلەرمەن بىرلەسىپ ۇيىمداستىردى.
«ءبىز ناۋرىز مەرەكەسىن قازاق مادەنيەتىن اشىپ كورسەتەتىن جانە ونىڭ سيپاتىن تولىق بەرەتىندىكتەن تاڭداپ الدىق. تابيعاتتىڭ جاڭارۋى، كوكتەمگى كوڭىل كۇي، دوستىڭ ىقىلاسى - بارلىعى دا وسى مەرەكەگە ۇيىسقان. ۇلتتىق مادەنيەتتەر فەستيۆالىنە وراي ءبىز كوپتەگەن حالىققا ورتاق ءارى قازاق مادەنيەتى مەن ءداستۇرىن اشىپ كورسەتەتىن مەرەكەنى ۇسىنىپ، ونى قازاق حالقى قالاي اتاپ وتەتىنىن جۇرتقا تاماشالاتقىمىز كەلدى»، - دەدى ۇلتتىق مادەنيەت كۇنىن ۇيىمداستىرۋشىلار جاس جۇبايلار لەران مەن گۇلجانات المۇحامەدوۆتار.
ناۋرىز مەرەكەسى قارساڭىندا كيىز ءۇيدىڭ ينتەرەرى، قازاقتىڭ تۇرمىستىق زاتتارى، قولونەر بۇيىمدارىنان كورمە جاسالىپ، قوناقتارعا باۋىرساق، قۇرت جانە ناۋرىز كوجەدەن ءدام تاتقىزىلدى.
مەرەكەنى تاماشالاۋشىلار «توعىز قۇمالاق»، «تۇيمەالۋ» جانە اسىق ويىندارىنان كۇش سىناستى. قىز- كەلىنشەكتەر اراسىندا ۇلتتىق اس ءمازىرى بويىنشا «وتباسىمىزداعى ءداستۇرلى تاعام» بايقاۋى ۇيىمداستىرىلدى.
كەلۋشىلەرگە ماسكەۋ جاستار فەستيۆالىنىڭ لاۋرەاتتارى «التىن كۇز» ءانىن شىرقاپ، «شابىت» دومبىراشىلار ءانسامبلى كۇي شەرتىپ، «توميريس» فولكلورلىق- حورەوگرافيالىق ءانسامبلى جانە «ياكسارت» توبىنىڭ ونەرپازدارى بي بيلەپ بەردى.
كونسەرت اياقتالعان سوڭ باعدارلاماعا قاتىسۋشىلار جانە بالالار سۋرەت بايقاۋىنىڭ جانە ۇلتتىق تاعام ازىرلەۋ بايقاۋىنىڭ جەڭىمپازدارى سالتاناتتى تۇردە ماراپاتتالدى.
«مۇراگەر» ماسكەۋلىك قازاق مادەنيەتى قوعامى» ءو ق ب پرەزيدەنتى ەرنازار نۇريەۆتىڭ ايتۋىنشا، وسكەلەڭ ۇرپاققا حالقىمىزدىڭ تاريحى مەن داستۇرىنە قىزىعۋشىلىعىن وياتۋ جانە ىنتالاندىرۋ ماڭىزدى مىندەت بولىپ تابىلادى.
اۆتور: جانىبەك امانگەلدى
