كينورەجيسسەر بەكمامبەتوۆ «العاشقىلار ءداۋىرى» فيلمىن ءتۇسىرۋ تاريحىمەن ءبولىستى - فوتو
كوسموناۆتيكا مەموريالدى مۋزەيىندە وتكەن كەزدەسۋگە تاياۋدا عانا ۇلكەن ەكرانعا جول تارتقان بەكمامبەتوۆتىڭ الەمدە ەڭ ءبىرىنشى بولىپ اشىق عارىشقا شىققان داڭقتى كەڭەس عارىشكەرى الەكسەي لەونوۆ جايىنداعى «العاشقىلار ءداۋىرى» فيلمى تۇرتكى بولدى.
«بۇل كۇن ءبىزدىڭ ەلىمىز ءۇشىن دە ماڭىزدى. ويتكەنى، بايقوڭىر بۇل قازاقستان مەن رەسەي سەرىكتەستىگى مەن دوستىعىنىڭ ستراتەگيالىق بۋىنى. كەزدەسۋ مەن فيلم كورسەتىلىمىنىڭ عارىشتى يگەرۋدەگى الەمدىك جەتىستىكتەر ساقتالعان كوسموناۆتيكا مۋزەيىندە ءوتۋىنىڭ دە ايرىقشا ءمان بار»، - دەدى كەزدەسۋدى اشقان قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى يمانعالي تاسماعامبەتوۆ.
كوسموناۆتيكا مەموريالدى مۋزەيىنىڭ ديرەكتورى ناتاليا ارتيۋحينا عارىشقا ەڭ ءبىرىنشى بولىپ ادامزات بالاسىن اتتاندىرعان قازاقستاننىڭ كوسموناۆتيكانى دامىتۋداعى باعا جەتپەس ۇلەسىن ايرىقشا اتاپ ءوتتى.
«قازاقستان رەسپۋبليكاسىنىڭ كوسموناۆتيكانى دامىتۋعا قوسقان ۇلەسى وتە اۋقىمدى. «بايقوڭىر» عارىش ايلاعىنان عارىشقا ادامنىڭ ەڭ ءبىرىنشى ۇشۋى الەمدىك تاريحتا ماڭگىگە قالادى»، - دەدى ارتيۋحينا. ءوز كەزەگىندە فيلم جايىندا كەڭىنەن ءسوز قوزعاعان بەكمامبەتوۆ ونى جازۋشىلار جازعان وقيعا جەلىسىندە ەمەس، الەكسەي لەونوۆتىڭ ءوزىنىڭ ايتۋى بويىنشا تۇسىرگەنىن باسا ايتتى.
«بۇل قۋانىش پەن ساتتىلىك جانە ۇلكەن جاۋاپكەرشىلىك بولدى. بارلىعىمىز دا ەگەر بۇل ادام ماعان فيلم ۇنامادى دەسە، وندا ءفيلمدى بىردە ءبىر كورەرمەن كورمەيتىندىگىن تۇسىندىك. دەگەنمەن، ءبىزدىڭ جولىمىز بولدى، ول فيلمدى زور ىنتامەن قابىلدادى. فيلمدى ەڭ ءبىرىنشى رەت الەكسەي ارحيپوۆيچ پەن ونىڭ جۇبايىنا كورسەتكەنىمىزدە، «ول جاقتا بارلىعى دا قورقىنىشتى بولعانىن مەن ەندى عانا ءتۇسىندىم» ، دەگەن بولاتىن»، - دەدى بەكمامبەتوۆ.
ول 20 مينۋتتان استام ۋاقىت بويى كەش قوناقتارىنىڭ ساۋالىنا جاۋاپ بەردى. بەكمامبەتوۆكە يمانعالي تاسماعامبەتوۆ تە ءوز ساۋالىن قويدى.
«كوپتەگەن يننوۆاتسيالىق شەشىمدەر بولدى. مۇنداي فيلمدەر رەسەيدە بۇرىن- سوڭدى تۇسىرىلگەن ەمەس. سوندىقتان ونى جۇزەگە اسىرۋ ءۇشىن ءتۇرلى مامانداردى ءتىپتى شەتەلدەن دە تارتۋعا تۋرا كەلدى. ءفيلمنىڭ ءبىر بولىگى قازاقستاندا ءتۇسىرىلدى. بىزدە كادرلاردى كومپيۋتەرلىك گرافيكادا ۇلەستىرۋدە پروبلەما بولدى. فيلمدە كۇردەلى كومپيۋتەرلىك گرافيكالار وتە كوپ. وسىعان وراي كەيدە قازاقستانداعى ارىپتەستەرىمىزدىڭ كومەگىنە جۇگىنۋىمىزگە دە تۋرا كەلدى»، - دەدى پروديۋسەر.
ونىڭ اتاپ وتۋىنشە، فيلم ءىس جۇزىندە ەكى رەت تۇسىرىلگەن. العاشقى رەت تۇسىرىلگەن تۋىندى فيلمدى تۇسىرۋشىلەردىڭ ەشقايسىسىنا ۇناماعان. كەزدەسۋ سوڭىندا قوناقتار نازارىنا «العاشقىلار ءداۋىرى» كينوكارتيناسى ۇسىنىلدى.
ايتا كەتەيىك، بۇل تۋىندى 6 -ءساۋىر كۇنى قالىڭ كورەرمەنگە جول تارتتى. فيلم ومىردە بولعان وقيعاعا نەگىزدەلىپ تۇسىرىلگەن. وندا 1965 -جىلى 18 -ناۋرىز كۇنى الەكسەي لەونوۆتىڭ «ۆوسحود-2» كەمەسىمەن اشىق عارىش كەڭىستىگىنە العاش شىققان تاريحي وقيعاسى باياندالادى. باستى رولدە كونستانتين حابەنسكي وينايدى.
اۆتور: مارلان جيەمباي
