اقتوبەدە ءىرى گاز كومپانياسىنىڭ باسشىسى سۇيىتىلعان گازدى زاڭسىز تاسىمالداعانى ءۇشىن تۇتقىندالدى
بۇل تۋرالى وبلىستىق سوتتىڭ باسپا ءسوز قىزمەتى حابارلادى. ول سۇيىتىلعان گازدى شەتەلگە تاسىمالدادى دەگەن كۇدىككە ىلىنگەن. كومپانيا باسشىسىن تۇتقىنداۋ تۋرالى سانكسيا 6- ءساۋىر كۇنى شىققان.
اتالعان كومپانيا وبلىستا سۇيىق وتىننىڭ كوتەرمە ساۋداسىمەن اينالىسىپ كەلىپتى. تەرگەۋ ورىندارى كومپانيا باسشىسىنىڭ جالعان قۇجاتتار ارقىلى ءىرى كولەمدەگى سۇيىتىلعان گازدى كەدەن بەكەتىنەن وتكىزىپ وتىرعانىن انىقتاعان.
يليادا دوسوۆا، اقتوبە وبلىستىق سوتىنىڭ باسپا ءسوز قىزمەتىنىڭ جەتەكشىسى:
«اقتوبە قالالىق نومەرى 2- سوتىنا «گولد ستەپس» ج ش س ديرەكتورى ەسەنوۆكە قاتىستى كۇزەتپەن ۇستاۋ تۇرىندەگى بۇلتارتپاۋ شاراسىن سانكسيالاۋ تۋرالى ءوتىنىش حات ءتۇستى. اقتوبە قالالىق نومەرى ەكىنشى سوتىنىڭ 06 - ءساۋىر، 2017 -جىلعى قاۋلىسىمەن ەسەنوۆكە قاتىستى كۇزەتپەن ۇاستاۋ تۇرىندەگى بۇلتارتپاۋ شاراسى 2 اي مەرزىمگە سانكسيالاندى».
ايتا كەتەلىك، بۇعان دەيىن قىلمىستىق توپتىڭ باسقا مۇشەلەرى ارنايى وپەراتسيا كەزىندە ۇستالعان بولاتىن. ەسەنوۆتىڭ ءوزى تەرگەۋ اباقتىسىندا 3- ماۋسىمعا دەيىن وتىرادى. ەستەرىڭىزدە سالايىق، ناۋرىز ايىنىڭ سوڭعى كۇندەرىندە اقتوبەلىكتەر گاز تاپشىلىعىن سەزىنىپ، بەكەتتەردە ۇزىن- سونار كەزەكتەر پايدا بولعان ەدى. ماسەلە ۇكىمەتكە دەيىن جەتىپ، پرەمەر تاپشىلىق سەبەبىن انىقتاۋدى تاپسىرعان بولاتىن.
ASTANATV. KZ
