ونسەگىز جاسىندا اكە اتانعان جىگىت ەرتە وتباسىن قۇرۋدىڭ ارتىقشىلىقتارى تۋرالى ايتتى
ول ءبىر كەزدەرى سۇيىكتىسىنەن ايىرىلىپ قالۋدان قاتتى قورىققان ەكەن. بۇل تۋرالى «ايەل باقىتى» باعدارالماسىندا ايتىلدى.
«بولاشاق جارىممەن 17 جاسىمدا تانىستىم. ول كەزدە كوللەدجدە ءبىلىم الىپ ءجۇردىم. سول جەردە بىرگە وقىدىق. كوللەدجگە مەنەن ءبىر جىلدان كەيىن كەلگەن بولاتىن. ەكەۋىمىز قىز- جىگىت بولىپ ءبىر جىل جۇردىك. اقىرىندا ۇيلەنۋگە شەشىم قابىلدادىم. ءبىر ۇلىمىز بار. قۇداي قالاسا، جۋىردا قىزىمىز دۇنيەگە كەلەدى. وسى ءساۋىر ايىنىڭ ىشىندە بوسانۋى ءتيىس. الدىمداعى ەكى اپكەم تۇرمىسقا شىعىپ كەتكەن سوڭ، اتا- اناما قارايتىن كەلىنشەك العىم كەلدى. باستاپقىدا جاس ەكەنىمدى ايتىپ، اتا- انام قارسى بولدى.
ءبىر جىل جۇرگەن سوڭ ۇيگە اكەلىپ قىزىمدى تانىستىردىم. سوڭىندا ايتەۋىر كەلىسىمىن بەردى. قىزدىڭ اكە- شەشەسى دە قارسى بولدى. ونىڭ ۇستىنە قىزىم كامەلەتتىك جاسقا تولىپ ۇلگەرمەگەن ەدى. ماحابباتتىڭ ارقاسىندا بارلىعىن جەڭىپ شىقتىق. اناما قاراعاندا، مەنىڭ وتباسىن قۇرۋىما اكەم قارسى بولعان سياقتى. ول تىكەلەي بەتىمە ايتپاسا دا، انام ارقىلى كوپ نارسەنى جەتكىزىپ وتىردى. 20 جاسقا دەيىن جۇرە تۇر دەپ ۇگىتتەدى. ارامىز سۋىپ كەتەدى نەمەسە باسقا بىرەۋلەر وت سالۋى مۇمكىن دەپ قورىقتىم. مەنىڭ تاراپىمنان قىزعانىش تا بولدى. ەڭ ءبىرىنشى كەزەكتە، اكە- شەشەمە قارايلاۋعا كومەكتەسكەنىن قالادىم.
مەنەن كەيىن ءبىر ءىنىم بار. استاناعا كوشىپ كەلگەنىمىزگە ءبىر جىل ۋاقىت بولىپ قالدى. ايەلىمە ءۇي شارۋاسىندا كومەكتەسىپ تۇرامىن. قاجەت بولسا ەت تۋراپ، قوقىستى شىعارامىن. ءبىراق جالاقىمدى كەلىنشەگىمە ەمەس، اپكەمە بەرىپ وتىرامىن. تاتۋ- ءتاتتى تۇرىپ جاتقاندىقتان، بولەك پاتەرگە شىققىمىز كەلمەيدى. العاش رەت توركىنىنە بارعىسى كەلەتىنىن ايتقاندا ۇرىستىق. توركىنىنە 5-6 ايدان كەيىن ءبىراق جىبەردىم. ەرتە ۇيلەنگەن سوڭ ومىرگە دەگەن كوزقاراسىڭ وزگەرەدى. دوستارىممەن قىدىراتىن كەزدە مىندەتتى تۇردە ەسكەرتىپ كەتەمىن. باسقا ۇيگە قونىپ قالعان كەزدەرىم بولماپتى. دوستارىم بار. ءبىراق ولارمەن بۇرىنعىداي ارالاسا المايمىن. ۋاقىتىڭ ازايىپ، باراتىن جەرلەرىڭ كوبەيەدى. ۋاقىتتى كەرى اينالدىرسا دا، وتباسىن قۇراتىن ەدىم. ءوزىمدى اكە، جار رەتىندە سەزىنە الامىن. وتباسىلىق ومىردە ەڭ باستىسى - جانۇيانىڭ باقىتى» ، - دەيدى قىدىرالى مىرزا.
پسيحولوگ مارال سارباس قىزى ءوز كەزەگىندە قىدىرالى مىرزانىڭ پسيحولوگيالىق تۇرعىدان وتباسىن قۇرۋعا دايىن ەمەستىگىن ايتىپ ءوتتى. ازىرگە تۋىسقاندارىمەن بىرگە تۇرۋعا دا كەڭەس بەردى.
«ادام فيزيولوگيالىق جانە پسيحولوگيالىق تۇرعىدان دايىن بولادى. وسى تۇستا ءسىزدىڭ وتباسىن قۇرۋىڭىزعا فيزيولوگيا باسىم سەبەپ بولىپ وتىر. پسيحولوگيالىق تۇرعىدان ءالى دە بولسىن دايىندىعىڭىز جوق. سەبەبى، قازىرگى وتباسىندا پايدا بولعان الەۋمەتتىك جاعدايدى تۋعان- تۋىسقاندار شەشىپ جاتىر. سول سەبەپتى سىزگە « ءوزىڭىزدى اكە، جار رەتىندە سەزىنەسىز بە؟ » دەگەن سۇراق قويدىم.
ارتىنشا ءسىزدىڭ قاتتى قوبالجىعانىڭىزدى بايقادىم. ەرتە ۇيلەنۋدىڭ ءبىر ەرەكشەلىگى - 16-18 جاستا ۇيلەنگەن ەر ازاماتقا وتباسىنداعى ءوزىنىڭ ءرولىن ءتۇسىنۋ ءۇشىن 6 جىل ۋاقىت كەرەك. ال وسى 6 جىل ىشىندە نە بولادى؟ ماحاببات ول كەرەك نارسە. ءبىراق كوزقاراس ءبىر جاقتا بولماسا، اراداعى تۇسىنىسپەۋشىلىكتەر قاقتىعىسقا اكەلىپ سوعادى. وسى تاقىرىپتىڭ توڭىرەگىندە ءبىراز ويلانىڭىز. سىزدەردى سۇيەمەلدەيتىن ادام بولىپ تۇر. ازىرگە بولەك شىعۋدىڭ سىزدەرگە قاجەتى جوق. ەموتسيانىڭ جەتەگىندە جۇرگەن ادامدار ەرتە وتباسىن قۇرادى. سەبەبى ولار ءىس- ارەكەتتى تارازىلامايدى» ، - دەيدى مامان.
Stan.kz
