الەم ونەرى تاريحىندا بۇرىن- سوڭدى بولماعان گاملەت تۋرالى فيلم
كورسەتىلىم «مۇمكىندىگى شەكتەۋلى جانداردىڭ ونەردەگى ورنى مەن ءرولى» عىلىمي جوباسى اياسىندا م. اۋەزوۆ اتىنداعى ادەبيەت جانە ونەر ينستيتۋتى «تەاتر جانە كينو»، «بەينەلەۋ ونەرى» بولىمدەرىنىڭ انار ەركەباي، ايدانا الامان، اينۇر كەنجەقۇلوۆا، ايگەرىم ەسپەنوۆا سىندى ءبىرقاتار عىلىمي قىزمەتكەردىڭ ۇيىمداستىرۋىمەن ءوتتى. اتالعان كارتينا الماتى قالالىق «اردي» قورىنىڭ قولداۋىمەن تۇسىرىلگەن. وندا باستى ءرولدى تاحير وماروۆ ەسىمدى 20 جاسار سەلەبرالدى سال اۋرۋىنا شالدىققان اسا دارىندى اكتەر سومداعان.
مۇمكىندىگى شەكتەۋلى دەگەن اتى عانا بولماسا جاس ونەر يەسىنىڭ شەبەرلىگىندە ءمىن جوق. كورسەتىلىمگە جيىلعان قاۋىم ءبىر اۋىزدان وسىنداي پىكىرگە كەلدى. ونەرسۇيەر قاۋىممەن كەزدەسۋگە كينوكارتينانىڭ اۆتورلارى ازيز زايروۆ پەن مۇحامەد مامىربەكوۆ جانە اكتەرلەر تاحير وماروۆ پەن قاناعات تاسقارايەۆ كەلدى. زالعا جينالعان قاۋىم ءتۇسىرىلىم توبىنىڭ شەبەرلىگىنە ءتانتى بولىپ الداعى شىعارماشىلىق جۇمىستارىنا ساتتىلىك تىلەدى. ال كينەماتوگرافيستەر، ءوز كەزەگىندە، كورەرمەن سۇراقتارىنا جاۋاپ بەردى. وسىعان دەيىن كارتينا ا ق ش- تىڭ «Superfest» فەستيۆالىن ۇيىمداستىرۋشىلار نازارىنا ىلىگىپ، 30 دان استام ەل قاتىسقان دودادا 85 فيلم ىشىنەن «مىنسىزدىك» نوميناتسياسىن جەڭىپ العان. وسى ماراپاتتى الۋعا بارعان ساپارىندا كارتينا سان- فرانسيسكو قالاسىنداعى Facebook كورپوراتسياسى مەكەمەسىندە دە كورسەتىلگەن ەكەن.
ءتۇسىرىلىم توبى بۇل جەتىستىكپەن توقتاپ قالماي، الداعى ۋاقىتتا "بىت يلي نە بىت" تريلوگياسىنىڭ ەكىنشى ءبولىمىن تۇسىرۋگە دايىندالىپ جاتقان كورىنەدى. ەكىنشى ءبولىم بىرىنشىسىندەي اۆتورلىق كينو جانرىندا ەمەس، الدەقايدا كوممەرتسيالىق كارتينا بولماق. وندا مۇمكىندىگى شەكتەۋلى بوزبالا مەن بويجەتكەن اراسىنداعى سەزىم تۋرالى باياندالادى. باستى ءرولدى سومداۋشى ءتاحيردىڭ اكتەر بولۋ دەگەن اسقاق ارمانى ورىندالعانىمەن قوسا، ەڭبەك جولى بارشا مىقتى اكتەردىڭ ارمانى سانالاتىن شەكسپيردىڭ گاملەت رولىنەن باستالدى. بۇرىن- سوڭدى الەمدە ءدال تاحيردەي گاملەت بولعان ەمەس، ەندەشە، ونەر جولى دا ءوز بولمىسىنداي دارا بولسىن.
Massaget.kz
