قوسشىداعى ليفتى زاۋىتىنىڭ ونىمىنە سۇرانىس ارتۋدا
بۇل تۋرالى اقمولا وبلىسىنىڭ اكىمى مالىك مىرزاليننىڭ جۇمىس بابىمەن اتالعان كاسىپورىندا بولعانىندا ايتىلدى، دەپ حابارلايدى «قازاقپارات» ح ا ا ءتىلشىسى.
زاۋىت ديرەكتورى ناريمان حابيبتىڭ ايتۋىنشا، قازاقستاندا بۇعان دەيىن ليفت جاسالماعان. بۇل ەلىمىزدەگى ليفت جاسايتىن العاشقى زاۋىت بولىپ وتىر.
«زاۋىت قۋاتى جىلىنا 1000-عا جۋىق ليفت جاساپ شىعارۋعا جەتەدى. قازىر مۇندا تۇرعىن ۇيلەر مەن كەڭسەلەرگە ارنالعان ستاندارتتى ليفتىلەردەن باسقا، جۇك، اۆتوكولىكتىك جانە اۋرۋحانا ليفتىلەرى دە شىعارىلادى. جەكە تاپسىرىس بويىنشا پانورامدىق ليفتىلەر دە قۇراستىرىلادى سونداي- اق، زاۋىت كوتتەدج ۇيلەرگە ارنالعان ليفتىلەردى دە، ەسكالاتورلار مەن تراۆولاتورلاردى دا شىعارادى»، - دەيدى ناريمان حابيب.
ونىڭ ايتۋىنشا، وتكەن جىلى بارلىعى 80 ليفت جانە 11 ەسكالاتور شىعارىلدى. كەلەشەكتە بۇل كورسەتكىشتى 1000 ليفتىگە دەيىن جەتكىزۋ جوسپاردا بار. زاۋىت ديرەكتورى اتاپ وتكەندەي، كاسىپورىن اشىلعانىنا كوپ ۋاقىت بولماسا دا، ونىڭ ونىمدەرىنە دەگەن سۇرانىس قازىردىڭ وزىندە كوبەيىپ وتىر. تاپسىرىس بەرۋشىلەر ورال، كوكشەتاۋ، قاراعاندى، پاۆلودار جانە ەلىمىزدىڭ باسقا دا قالالارى.
«ءبىز ونىمدەرىمىزدى ساتىپ العان عيماراتقا تولىقتاي ورناتۋ، ودان ءارى قىزمەت كورسەتۋ، جوندەۋ جۇمىستارىن دا ءوز مويىنىمىزعا الامىز. ليفتىلەردىڭ نەگىزگى بولىگى، ياعني تەمىر كورپۋسى، ەدەنى، توبەسى، قابىرعالارى جانە شاحتادا بولاتىن بارلىق تەمىر قۇرىلعىلارى قازاقستاندىق ونىمدەردەن جاسالادى»، - دەدى ن. حابيب.
اۆتور: اسلان وسپانوۆ
