توقال الامىن دەپ ايەلىنەن تاياق جەپ قالدى

 استانا. قازاقپارات - قازىر توقال تاقىرىبى قىزىپ تۇر. كۇيىپ تۇر دەسە دە بولعانداي. الەۋمەتتىك جەلىنى اشىپ قالساڭ، اڭگىمەسىنىڭ ءبىر ۇشىن ەكىنشى ايەلگە اكەپ تىرەيتىن ەركەكتەردىڭ كوبەيىپ كەلە جاتقانىن بايقايسىڭ.

قانشاسى وتباسىنىڭ شىرقىن بۇزىپ الىپ وتىر. نەگە؟ ويتكەنى جۇرت وعان جەڭىل- جەلپى قارايدى. ءدىن تانۋشى ەرسىن امىرە توقال ماسەلەسى نەلىكتەن ءورشىپ تۇرعانىن ءازىل اڭگىمە ارقىلى ءتۇسىندىرىپ بەرگەن ەكەن.

«ءبىر كىسى اسحانادا ىدىس جۋىپ جاتقان ايەلىنە بارىپ، ەكىنشى ايەل الۋ تاقىرىبىن كوتەرىپتى. ول «ءبىزدىڭ قانشا بالامىز بار؟ » دەپ سۇراپتى، ايەلى: «بەسەۋ» دەپ جاۋاپ بەرىپتى. «سولاردىڭ قايسىن كوبىرەك جاقسى كورەسىڭ؟ » دەسە، « ءبارىن بىردەي جاقسى كورەمىن عوي» دەپتى ايەلى. «جۇرەگىڭە 5 بالاعا دەگەن ماحاببات قالاي سىيىپ تۇر؟ » دەگەن سۇراعىنا، «اللا تاعالا انالاردى جۇرەگى كەڭ ەتىپ جاراتقان عوي» دەپ جاۋاپ بەرىپتى. سوندا ول: «كوردىڭ بە، ەركەكتەردىڭ دە جۇرەگى سونداي كەڭ. سەندەردىڭ جۇرەكتەرىڭە ورىك سياقتى ءبىر عانا ءدان سياتىن بولسا، ءبىزدىڭ جۇرەگىمىز انار سياقتى، ىشىندە ءدانى كوپ» دەپ ۋاعىز ايتىپتى. ايەلى اشۋلانىپ كەتىپ، كۇيەۋىنە پىشاق سۇعىپ الىپتى.

وسى وقيعانى مىسالعا كەلتىرىپ، ءبىر شەيح: «بۇل كىسى تاقىرىپتى دۇرىس تاڭداپ، دۇرىس جەتكىزدى. ءبىراق ۋاقىتى مەن ورنىن دۇرىس تاڭداعان جوق. ايەلدىڭ قولىندا پىشاق تۇرعان كەزدە ەمەس، باسقا جەردە ايتۋ كەرەك ەدى. سول ءۇشىن ونىڭ ءىسى دانالىققا ساي بولمادى» ، - دەپ جازعان ەكەن. سول ءۇشىن دە ادام ۋاقىتىن، ورنىن دۇرىس تاڭداي ءبىلۋ كەرەك. ايتپەسە، الگى ەركەك سياقتى قۇربان بولىپ كەتەسىڭ» ، - دەيدى ەرسىن امىرە.

ۆيدەو ihsan.kz سايتىنان الىندى.