ەگيپەت حالقى نەگە ءبىر ءۇزىم نانعا زار بولاتىن كۇيگە ءتۇستى

استانا. قازاقپارات - ەگيپەت ەكونوميكالىق داعدارىستىڭ از-اق الدىندا تۇر.

ويتكەنى ەلدىڭ نەگىزگى تابىس كوزىنىڭ ءبىرى سانالاتىن تۋريستىك سالا تۇرالادى.

وعان قوسا سۋەتس ارناسىنان تۇسەتىن تابىس ازايدى.

وتكەن جىلدان بەرى مۇنداعى ينفلياتسيا كولەمى 30 پايىزعا ءوستى. سالدارىنان ازىق- تۇلىك تاپشىلىعى بايقالىپ، باعاسى شارىقتادى. مىسىرداعى ساۋداسى قايناپ جاتاتىن ازىق- تۇلىك ساتاتىن ءىرى بازارلاردىڭ بىرىندە بۇگىندە ادامنىڭ قاراسى از.

ويتكەنى سوڭعى بىرنەشە ايدىڭ ىشىندە باعا 40 پايىزعا قىمباتتادى. ال تۇرعىنداردىڭ ونى ساتىپ الاتىن اقشاسى جوق. ەكونوميكالىق قيىندىقتارمەن بىرگە الەۋمەتتىك احۋال دا ناشارلادى. جاستاردىڭ كوبى ەكى قولعا ءبىر كۇرەك تاپپاي ءجۇر. «ءبىر كۇن اش، ءبىر كۇن توقپىز. جۇمىس، اقشا دەگەندى سۇرامايتىن دا بولدىق. بيلىك جۇمىس بەرە الماسا، تاماق بەرىپ اسىراسىن. ءبىر ءۇزىم نان الىپ جەي المايتىن كۇيگە تۇستىك»، - دەيدى كاير تۇرعىنى ماحمۋد ابۋلحاسسان.

وتكەن جىلدىڭ كۇزىندە مىسىردىڭ ورتالىق بانكى جاعدايدى تۇزەۋ ءۇشىن ۇلتتىق اقشاسىن دەۆالۆاتسيالادى. بۇل كايرگە حالىقارالىق ۆاليۋتا قورىنان 12 ميلليارد دوللار نەسيە الۋعا مۇمكىندىك بەردى. وعان قوسا بيلىك ەكونوميكانى تۇراقتاندىرىپ، ينۆەستورلاردىڭ سەنىمىنە كىرۋدى كوزدەدى. دەگەنمەن ءىس جۇزىندە قاراپايىم حالىقتىڭ تابىسى ازايدى.

ال ازىق- تۇلىك قاۋىپسىزدىگىن باقىلايتىن مامان دينا بەحيتتىڭ ايتۋىنشا، ەلدەگى بۇل جاعداي ءالى دە جالعاسا بەرەتىن بولادى.

«ارينە، ازىق- تۇلىك تاپشىلىعى ءالى دە جالعاسا بەرەدى. ويتكەنى ءوندىرىس سۇرانىستى قامتاماسىز ەتە المايدى. حالىقتىڭ سانى جىل سايىن كوبەيىپ جاتىر. ال اۋىل شارۋاشىلىعىنىڭ جەرلەرى كەرىسىنشە، كەمىپ كەلەدى»، - دەيدى ول.

ەگيپەت ەكونوميكاسىنا ەلەۋلى ۇلەس قوسىپ كەلگەن تۋريزم سالاسى سوڭعى ون جىلداعى ەڭ قيىن كەزەڭدى وتكەرىپ جاتىر. ساياحاتشىلاردىڭ سيرەۋىنە 2015 -جىلى رەسەيلىك ۇشاقتىڭ اپاتقا ۇشىراۋى سەبەپ بولدى. سودان بەرى مۇندا كەلەتىن تۋريستەردىڭ لەگى 70 پايىزعا ازايدى.

دەرەككوز: «حابار 24» ارناسى.