جىل سوڭىنا دەيىن ەلىمىزدە ۇشاق بيلەتتەرى ارزانداۋى مۇمكىن

استانا. قازاقپارات - ەلىمىزدە جىل اياعىنا قاراي اۋە بيلەتتەرىنىڭ باعاسى ارزانداۋى ءتيىس. بۇل تۋرالى ق ر ينۆەستيتسيالار جانە دامۋ ءمينيسترى جەڭىس قاسىمبەك سەنات قابىرعاسىندا وتكەن اۋە كەڭىستىگىن پايدانالۋ جانە اۆياتسيا قىزمەتى ماسەلەلەرى بويىنشا زاڭ جوباسىن تالقىلاۋ بارىسىندا مالىمدەدى.

ونىڭ ايتۋىنشا، بيلەت قۇنىنا مۇناي وڭدەۋ زاۋىتتارىنىڭ جاڭعىرتىلۋى اسەر ەتۋى ءتيىس. ۆەدومستۆو باسشىسىنىڭ پىكىرىنشە ەگەر كاسىپورىندار جوندەۋدەن وتسە، قازاقستاندا اۋە كەروسينى ارزانداپ، ونى يمپورتقا شىعارۋعا دا مۇمكىندىك تۋادى.

جەڭىس قاسىمبەك، ق ر ينۆەستيتسيالار جانە دامۋ ءمينيسترى:

 - بۇگىندە ءبىز كەروسيننىڭ 60 پايىزىن شەتەلدەن الىپ كەلەمىز. ونىڭ باعاسى اۋە بيلەتى قۇنىنىڭ 30 پايىزىن قۇرايدى. ول اۋەجايلاردا ءارتۇرلى. 150 مەن 300 مىڭ تەڭگە ارالىعىندا تۇرادى. مۇناي وڭدەۋ زاۋىتتارى جوندەۋدەن ءوتىپ جاتىر. جىل سوڭىنا دەيىن جاڭعىرتۋ جۇمىستارى اياقتالۋى ءتيىس. ناتيجەسىندە بىزگە قاجەتتى 800 مىڭ توننا كەروسين ءوندىرىلىپ، اۋە بيلەتىنىڭ باعاسى تومەندەيدى دەپ كۇتىپ وتىرمىز.

ءمينيستردىڭ حابارلاۋىنشا قازىر قازاقستان اۋماعىندا جانە شەتەلگە قاتىنايتىن ۇشاق بيلەتتەرىنىڭ قۇنىن ارزانداتۋ ءۇشىن ءبىرقاتار شارالار قولعا الىنعان. ەڭ باستىسى اۋە كومپانيالارىنىڭ اراسىندا باسەكەلەستىكتىڭ ورناۋى. ماسەلەن، جاقىندا عانا ۆەنگريالىقتار جولاۋشىلاردى ەۋروپاعا ارزان تاريفپەن جەتكىزۋگە دايىن ەكەندىكتەرىن جەتكىزدى. وتاندىق كومپانيالار دا حالىقارالىق اۋە قاتىناسىن، دامىتۋعا دايىن. بيىل حەلسينكي جانە ۆارشاۆاعا رەيستەر اشىلادى، - دەدى قاسىمبەك.

www.24.kz