قاراعاندى وبلىسىندا ەكى اۋداندى سۋ باستى

قاراعاندى. قازاقپارات - قاراعاندى وبلىسىنداعى ەكى ەلدىمەكەن سۋ استىندا قالدى، دەپ حابارلايدى «قازاقپارات» ح ا ا ءتىلشىسى.

 «قاراعاندى وبلىسىندا تاسقىن سۋمەن كۇرەس ءىس- شارالارىنىڭ نەگىزگى كەشەنى قارقارالى، شەت اۋداندارىنا باعىتتالعان. ول جەرلەردە سۋ ايداپ شىعاراتىن تەحنيكالار جۇمىس جاساۋدا. اعىن سۋ وتكىزەتىن جول استى قۇبىرلار تازارتىلىپ، تاسقىن سۋدى جينايتىن اڭعارلار جاسالىنۋدا. قارلاردى شىعارىپ جاتىر. ت ج دەپارتامەنتى مەن جەرگىلىكتى اتقارۋشى ورگانداردىڭ كومەگىمەن سۋدىڭ دەڭگەيىن تاۋلىك بويى باقىلاۋدا»، - دەپ حابارلادى ت ج دەپارتامەنتىنىڭ باسپا ءسوز حاتشىسى قۋانىش ءمۇتاللاپوۆ.

قازىرگى تاڭدا جەرگىلىكتى ماڭىزى بار اۆتوجولدىڭ ءۇش ۋچاسكەسىن جانە رەسپۋبليكالىق ماڭىزى بار جولدىڭ ءبىر ۋچاسكەسىن تاسقىن سۋ ازداپ شايىپ وتكەن.

شەت اۋدانىندا شەرۋباي- نۇرا وزەندەرىندەگى سۋدىڭ دەڭگەيى جوعارىلاپ، سالدارىنان شوپا اۋىلىنا باراتىن جول شايىلىپ كەتتى. وسى سەبەپتى جول بويىندا كولىكتىڭ جۇرۋىنە تولىقتاي تىيىم سالىنىپ، پوليتسەي بەكەتتەرى قويىلدى. سۋ ايداپ شىعاراتىن ارنانى كەڭەيتۋ جانە تازالاۋ جۇمىستارى جۇرگىزىلۋدە، سۋ ارنايى تەحنيكا كومەگىمەن ايدالۋدا، تۇرعىندار ءوز ۇيلەرىنىڭ اۋماعىنداعى قارلاردى شىعارۋدا.

وبلىستىق سۋ تاسقىنىنا قارسى شتابتىڭ باسشىسى، قاراعاندى وبلىسى اكىمىنىڭ ورىنباسارى اندرەي لياپۋنوۆ ءىرى سۋ قويمالارى مەن سۋ تاسقىنىنىڭ قاۋپى بار ۋچاسكەلەردى تەكسەرىپ، ءبىرقاتار تاپسىرمالار بەردى.

**

«قازگيدرومەت» ر م ك- ءى قاراعاندى وبلىسىنداعى بوگەتتەردە سۋ قاۋىپتى دەڭگەيگە جاقىنداۋىنا بايلانىستى ەسكەرتۋ جاريالادى.

 «قاراعاندى وبلىسىندا شەرۋباينۇرا وزەنىندەگى شوپان گيدرولوگيالىق بەكەتىندە سۋ قاۋىپتى دەڭگەيگە جاقىنداۋ قاۋپى تۋىنداۋدا. جامان- سارىسۋ وزەنىندەگى اتاسۋ گيدرولوگيالىق بەكەتىندە سۋ دەڭگەيىنىڭ قاۋىپتىلىگى بۇرىنعىسىنشا ساقتالادى.

 6 - 7 - ءساۋىر شەرۋباينۇرا، جامان- سارىسۋ، سارىسۋ وزەندەرىندە قاۋىپتى جاعداي ساقتالادى»، - دەلىنگەن سينوپتيكتەردىڭ ەسكەرتۋىندە.