جارىڭىزدان جاسىرعانىڭىز بار ما؟
ۋاپكەرشىلىك، قامقورلىق، كوڭىل ءبولۋ - بارلىعى وسىدان شىعادى. ءسىز سەرىگىڭىزبەن كەز كەلگەن تاقىرىپتا اشىق سويلەسە بىلەسىز بە؟
بۇل جەردە ەشقانداي ايىپتاۋ، كەمسىتۋ، كەلەكە ەتۋ، سىناۋ بولماۋى كەرەك. ءيا دەپ جاۋاپ بەرە الساڭىز، ءوزىڭىزدى باقىتتىلار قاتارىنا قوسا بەرىڭىز.
دەمەك جۇرەكتەرىڭىز ماحاببات پەن ۇيلەسىمگە تولى، ءبىر-ءبىرىڭىزدى تاۋىپ قوسىلعانسىزدار. ءبىر ءبىرىن شىن سۇيەتىن جاندار ساعاتتاپ ءسوزى تاۋسىلماي سويلەسە بەرەتىنىن ومىردە كورىپ ءجۇرمىز.
كۇدىك، ءۇمىت، سەنىمسىزدىك، قورقىنىش، قىزعانىش... تاقىرىپ تاۋسىلمايدى. تەك ءبىر-ءبىرىنىڭ دەنە بىتىمىنە قاتىستى (فيزيولوگيالىق) ەرەكشەلىكتەر مەن وتكەن جەكە ومىرىنەن باسقا بارلىق ارنادا اڭگىمە وربىتە بەرۋگە بولادى.
ادام ءوزى ىشتەي ويلانعاندا قاي «عالامعا» بولسا دا بارىپ كەلەدى. جولداسىن دا ءوزى سياقتى قابىلداپ، وعان ايتا المايتىن ويى بولماۋى كەرەك.
بۇل اڭقىلداپ، نە بولسا سونى ايتا بەرۋ دەگەن ماعىنا ەمەس. ءسىز سويلەسكىڭىز كەلگەندە، ىشتەگىنى اقتارعىڭىز كەلگەندە، ول ءاردايىم قۇلاق قويۋعا دايىن بولسىن دەگەن ءسوز. جاي عانا تىڭداماي، شىن نيەتپەن ءتۇسىنىپ، سەزىنىپ، قولداي بىلگەنى ءجون. ول ءوز پىكىرىن ايتۋى مۇمكىن، ءتىپتى ءسىزدىڭ پىكىرىڭىزبەن كەلىسپەۋى دە عاجاپ ەمەس.
تەك ءسىزدىڭ قۇبىلمالى كۇيىڭىزدە كوڭىلىڭىزگە كىربىڭ كەلتىرمەۋدى ويلاۋى ءتيىس. ءوز ويىن ايتاتىن قولايلى ءساتتى كۇتەدى نە ءسوزىن سىزگە تىگىسىن جاتقىزىپ، جۇقالاپ جەتكىزەدى. شىنايى جاقىندىق وسىدان كورىنەدى.
ونىڭ ساناسىندا ءاردايىم «مەن ونىڭ جانىنا جارا سالماۋىم كەرەك» دەگەن وي تۇرۋى كەرەك. ۇساق-تۇيەك بولسا دا... تەك قانا ايالاپ، الپەشتەۋ... ءتىپتى كەلىسپەۋشىلىكتىڭ ءوزى نازىك تۇردە ءوتىپ كەتۋى كەرەك.
ءوزىڭىز قينالىپ، ماسەلەڭىزدى ايتىپ تۇرعاندا، ول ءوزىن تاجىريبەسىز مۇعالىم سەكىلدى ۇستاپ: «كوردىڭ بە، ايتتىم ساعان، بارىنە ءوزىڭ كىنالىسىڭ. ايقايلايسىڭ، شۋ شىعاراسىڭ، اشۋلاناسىڭ، ودان دا ءوزىڭدى تارتىپكە شاقىر» دەسە، ونداي مۇعالىمنىڭ نە كەرەگى بار؟ ولاي ايتۋ كەز كەلگەن كىسىنىڭ قولىنان كەلەدى. سۇيەتىن ادام ەشقاشان بۇلاي «قولداۋ كورسەتپەيدى».
اشۋلانىپ، جانىڭ اۋىرىپ تۇرسا، ول تۇسىنەدى. شىن جاقسى كورەتىن جان ءسىزدىڭ جانىڭىزدى جارالار تۇسقا قاراي بارمايدى، سەبەبى وندا ءوزىنىڭ دە جانى اۋىرادى. سۇيەتىن جان ءۇشىن ناعىز جاقىن جانى جەتىلە تۇسكەنى، ارمانىن ىسكە اسىرعانى ماڭىزدى. سۇيگەن جان باقىتتى بولۋى ءتيىس. ەگەر ەكەۋى دە وسىلاي ويلاسا، ارالارىندا شىنايى سەزىم بار بولعانى. ەگەر ول ءسىزدى ازاپتاسا، دەمەك ءسىزدىڭ جۇرەگىڭىز اۋىرعانىنا ول قينالمايدى.
كوڭىلىڭىزگە قارامايتىن بولسا، سوزىڭىزگە قۇلاق اسقىسى كەلمەسە، وعان ءسىزدىڭ باقىتتى بولۋىڭىز ماڭىزدى ەمەس. ەگەر سەرىگىڭىزبەن ءدال ءوز-ءوزىڭىز سەكىلدى قارىم-قاتىناس جاساي الماساڭىز، دەمەك وزىڭىزدەن وزگە جاقىنىڭىز جوق بولعانى.
Massaget.kz
