موسۋلدى تاستاپ كەتكەن جەرگىلىكتى تۇرعىندار سانى ارتتى

استانا. قازاقپارات - يراك اسكەرى موسۋل قالاسىن ازات ەتۋ وپەراتسياسىن باستاعالى بەرى شاھاردان امالسىز كوشكەن تۇرعىندار سانى كۇرت ارتتى.

بۇل تۋرالى حالىقارالىق كوشى-قون ۇيىمى مالىمدەدى، دەپ جازادى «حابار 24».

دەرەكتەرگە قاراعاندا وتكەن جىلدىڭ قازان ايىنان بەرى موسۋلدى 300 مىڭنان استام ادام تاستاپ كەتكەن. ال وسى قالا ورنالاسقان نايناۆا پروۆينسياسىنان 280 مىڭ تۇرعىن باس ساۋعالاعان. ويتكەنى موسۋلدى بەيرەسمي استانامسىز دەپ جاريالاعان لاڭكەستەر ۇكىمەت اسكەرىنە تەگەۋرىندى تويتارىس بەرىپ، بەيبىت تۇرعىنداردى ءتىرى قالقان رەتىندە ءجيى پايدالانادى.

ەسكە سالا كەتەيىك، يراك جاۋىنگەرلەرى موسۋلدى ازات ەتۋگە وتكەن جىلدىڭ قازانىندا كىرىستى. بۇگىندە سودىرلار شاھاردىڭ تەك 30 پايىزىن عانا ۋىسىندا ۇستاپ وتىر. سوڭعى مالىمەتتەرگە قاراعاندا قاقتىعىس كەزىندە بيلىك جاساعىنىڭ سوققىسىنان ءابۋ مۋحادجير ءار- رۋسي دەگەن لاقاپ اتپەن تانىلعان سودىرلاردىڭ قولباسشىسى قازا تاپتى. يراك فەدەرالدى پولتسياسىنىڭ مالىمەتى بويىنشا ونىمەن بىرگە تاعى 6 لاڭكەس وققا ۇشقان.