باتىس قازاقستان وبلىسىنىڭ اكىمى كاسىپكەرلەرمەن اپتاسىنا ءبىر رەت كەزدەسىپ تۇرماق

ورال. قازاقپارات - كاسىپكەرلەرمەن كەزدەسۋلەر تۇراقتى سيپات الىپ، ولارعا قولداۋ كورسەتىلەدى.

 بۇل تۋرالى بۇگىن وبلىس اكىمى التاي كولگىنوۆ وڭىرلىك كاسىپكەرلەر پالاتاسىندا كاسىپكەرلەردى قابىلداعان كەزدە ءمالىم ەتتى، دەپ حابارلايدى «قازاقپارات» ءتىلشىسى.

كاسىپكەرلەردىڭ باستاماسىمەن مۇنداي كەزدەسۋ العاش رەت ۇيىمداستىرىلىپ وتىر. ولار جۇمىس بارىسىندا كەزدەسەتىن قيىندىقتار مەن ءوز جوبا- جوسپارلارى جونىندە ءوڭىر باسشىسىنا تىكەلەي ايتۋعا مۇمكىندىك الدى. كەزدەسۋدە، مىسالى، كولىك- لوگيستيكالىق ينفراقۇرىلىمدى دامىتۋ، ەۋروپا مەن قازاقستان اراسىنداعى كولىك قىزمەتىنىڭ ىقپالداستىعى ماسەلەسى قوزعالدى. قازىرگى تاڭدا تەڭىز، قاشاعان، قاراشىعاناقتاعى ءىرى قازاقستاندىق جوبالاردى جۇزەگە اسىرۋ كەزىندە كەن يگەرۋشى كومپانيالاردىڭ جەرگىلىكتى كاسىپكەرلەردى قوسالقى مەردىگەرلىككە تارتاتىنى جاسىرىن ەمەس. سوندىقتان ولارمەن تىكەلەي جۇمىس جاسايتىن ۋاقىت جەتتى.

وسى ورايدا ءۇش جىلدان بەرى ەۋروپاداعى جۇك تاسىمالداۋشىلارمەن قوسالقى مەردىگەر رەتىندە جۇمىس جاسايتىن «KREISS ASIA» ج ش س- نىڭ ديرەكتورى نۇربولات جۇماعاليەۆ جەر قويناۋىن پايدالانۋشىلار جوبالارىن كەڭەيتۋگە باعىت ۇستاپ وتىرعان مەزگىلدە سول ءىرى كومپانيالارمەن كەزدەسۋ ۇيىمداستىرىپ، جەرگىلىكتى كاسىپكەرلەردىڭ كەڭەيتىلەتىن جوبالارعا قاتىسۋىن قامتاماسىز ەتۋمەن شۇعىلداناتىن جۇمىس توبىن قۇرۋ قاجەتتىگىن جەتكىزدى. سول سەكىلدى ورال قالاسىنىڭ گەوگرافيالىق ورنالاسۋىن، اقتاۋ تەڭىز پورتىنىڭ دامۋىن، تەڭىز جانە قاراشىعاناق جوبالارىنىڭ كەڭەيۋىن ەسكەرە وتىرىپ، وڭىردە كولىك- لوگيستيكالىق ورتالىق قۇرۋ وزەكتى بولا تۇسۋدە.

ءوڭىر باسشىسىنىڭ ويىنشا، بۇل - كاسىپكەرلەر ءۇشىن قوسىمشا مۇمكىندىكتەر. قازىردىڭ وزىندە جوسپار بار، جەر تەلىمى بولىنگەن، ينۆەستور ورتالىق قۇرىلىسىن سالۋعا بيىل كىرىسپەك. اكىمنىڭ قابىلداۋىنا كەلگەن «ورالمەدرەگيون» ج ش س باسشىسى اندرەي پاۆلوۆ پەن «وليمپ» كلينيكالىق دياگنوستيكالىق زەرتحانالار جەلىسىنىڭ ديرەكتورى ەرلان سۇلەيمەنوۆ دەنساۋلىق ساقتاۋ سالاسىنداعى جەرگىلىكتى ۇلەستى كوبەيتۋ، مەملەكەتتىك- جەكەمەنشىك ارىپتەستىكتى دامىتۋ، وسى ورايدا اكىمشىلىك كەدەرگىلەردى بولدىرماۋ جونىندەگى ويلارىمەن ءبولىستى.

«جايىق پاراعى» ج ش س ديرەكتورى اسلانبەك سۇندەتوۆ ورال قالاسىندا ا-4 فورماتىنداعى قاعاز ءوندىرىسىن جولعا قويۋ ءۇشىن 40 ميلليون تەڭگە كەرەك ەكەندىگىن بايان ەتتى. ول مەملەكەت تاراپىنان دەمەۋقارجى مەن كەپىلدەندىرۋگە قول جەتكىزگىسى كەلەدى. بۇل جوبانى «دامۋ» قورىنىڭ قولداۋىمەن جۇزەگە اسىرۋعا بولادى، ءبىراق قاعاز نارىعىندا اۋەلدەن ورنى بار كومپانيالارمەن باسەكەلەستىكتىڭ وڭايعا تۇسپەيتىندىگىن ەسكەرۋ دە قاجەت.

«مۇنداي كەزدەسۋلەردى ءبىز اپتاسىنا ءبىر رەت وتكىزۋدى كوزدەپ وتىرمىز. بۇل ءوزارا پىكىر الىساتىن ناقتى ءىس الاڭىنا اينالۋى كەرەك. وعان كەز كەلگەن كاسىپكەر كەلىپ، ءوز ۇسىنىسىن بىلدىرە الادى. قازىرگى تاڭدا مەملەكەتتىك- جەكە مەنشىك ارىپتەستىكتى دامىتۋدىڭ ماڭىزى زور. سوندىقتان وڭىرلىك كاسىپكەرلەر پالاتاسىمەن بىرلەسە وتىرىپ، كاسىپكەرلەرگە جان- جاقتى قولداۋ كورسەتەتىن بولامىز. ەلباسىمىز بيزنەستىڭ باسەكەگە قابىلەتتى بولۋى ءۇشىن بارلىق جاعدايدى جاساپ وتىر. سونى ءبىز جەرگىلىكتى جەردە جۇزەگە اسىرا ءبىلۋىمىز كەرەك»، دەدى التاي كولگىنوۆ.

 اۆتور: ەلجان ەرالى