تورەشىنى سوققىعا جىققان فۋتبولشى ءومىر بويىنا سپورتتان شەتتەتىلدى - كەسكىن
جاسىل الاڭداعى قاقتىعىس ويىننىڭ 2 مينۋتىندا ورىن العان. الدىمەن ماركو گونسالۆەش قارسىلاس كوماندانىڭ ويىنشىسىن جۇدىرىقتاپ ۇرادى. كەيىننەن "قىزىل قاعاز" كورسەتكەن تورەشىنى تىزەسىمەن ءدال تۇمسىعىنان تەپكەن. الاڭعا ءتارتىپ ساقشىلارى شىعىپ، فۋتبولشىنى تۇتقىنداعان. ال ويىن قاقتىعىستان كەيىن جالعاسقان جوق. جاراقات العان باس تورەشى اۋرۋحاناعا جەتكىزىلگەن. دەگەنمەن ماركو گونسالۆەش الاڭداعى قاقتىعىستا ءوزىن ايىپتى سانامايدى.
- مەن تورەشىنى قالاي ۇرعانىم ەسىمدە جوق. شاماسى ول مەنى كەۋدەمنەن يتەرىپ جىبەرسە كەرەك. مەن سوت الدىندا ونىڭ وتباسىنان كەشىرىم سۇراۋعا دايىنمىن. ال قارسىلاس كوماندانىڭ ويىنشىسى مەنى ارانداتۋعا تىرىسىپ، اۋىر سوزدەر ايتتى. بالاعاتتادى. مەن ەسەمدى جىبەرگىم كەلگەن جوق. جاي ءتۇرتىپ قالعانىم سول ەدى، جاس بالا سەكىلدى جىلاپ جىبەردى. تورەشى قىزىل قاعاز كورسەتتى. مەن وعان ادەيى قول كوتەرگەن جوقپىن. ول مەنىڭ نامىسىما ءتيدى، - دەدى فۋتبولشى. ءبىر قىزىعى، "كانەلاس 2010" كومانداسىنا قارسى وزگە كوماندالار ويناعىسى كەلمەيدى ەكەن. وسىعان دەيىنگى 17 ويىننىڭ 16 سىندا جەڭىسكە جەتكەن. ونىڭ 12 دە قارسىلاستارى ويناۋدان باس تارتقان. سەبەبى "كانەلاس 2010" فۋتبولشىلارى الاڭدا وتە دورەكى وينايتىن كورىنەدى. سوندىقتان دا كوبىنە قارسىلاستارى ولارمەن ويناپ جاراقات العانشا، تەحنيكالىق جەڭىلىس پەن 750 ەۋرو كولەمىندەگى ايىپپۇلدى تولەي سالۋدى ءجون سانايدى ەكەن.
Massaget.kz
