نىعماتۋلين ەنەرگەتيكا مينيسترلىگىنىڭ وزىنە ءتان ەمەس مىندەتتەرىن سىنادى
دەپ حابارلايدى قازاقپارات.
جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەلەكتر ەنەرگەتيكاسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ بارىسىندا دەپۋتات پاۆەل كازانتسيەۆ مينيسترلىك ءوز قۇزىرەتىنە كىرمەيتىن جارىستاردى دايارلاۋ مەن بەكىتۋ قۇقىعىن زاڭنامالىق تۇرعىدا تىركەۋگە تالپىنىپ وتىرعاندىعىنا نازار اۋداردى.
كازانتسيەۆ زاڭ جوباسى «ەلەكتر ەنەرگەتيكا سالاسىندا قاۋىپسىزدىكتى قامتاماسىز ەتۋ بويىنشا جەدەل- جوندەۋ پەرسونالىنىڭ سالالىق جارىستارىن وتكىزۋدىڭ ەرەجەلەرىن ازىرلەۋ مەن بەكىتۋ» قۇزىرەتىمەن تولىقتىرىلىپ جاتقانىن ايتا كەلە: «بۇل قالاي؟ وكىلەتتى ورگاننىڭ سالالىق جارىستاردى وتكىزۋدەن باسقا اتقاراتىن جۇمىسى جوق پا؟ اتاپ ايتقاندا ول زاڭنىڭ نورماسى رەتىندە تىركەلىپ وتىر»، - دەدى.
ونىڭ پايىمىنشا، بۇل قىزمەتتى قوعامدىق بىرلەستىكتەر دە اتقارا الادى. سوندىقتان وسىنداي تۇزەتۋدى ەنگىزۋدىڭ قاجەتى جوق بولىپ تۇر. «ۇكىمەت وزىنە ءتان ەمەس قىزمەتتەردى مەملەكەتتەن وزگە سالالارعا بەرىپ جاتقانىن جاريالاپ جاتىر. ال شىن مانىندە زاڭنامالىق باستامالار ارقىلى سالالىق جارىستاردى وتكىزۋگە دەيىنگى جاڭا مىندەتتەردى وزىنە الىپ جاتىر»، - دەدى كازانتسيەۆ.
ءوز كەزەگىندە ەنەرگەتيكا ءمينيسترى قانات بوزىمبايەۆ بۇل نورما زاڭ جوباسىنا قازاقستان ەلەكتر ەنەرگەتيكاسى قاۋىمداستىعى ءوتىنىشى بويىنشا ەنگىزىلگەنىن جەتكىزدى. قاۋىمداستىق قازاقستاندا وسىنداي جارىستاردى وتكىزۋ ءۇشىن ەلىمىزدە قانداي دا ءبىر ەرەجەلەر بولۋىن العا تارتۋدا.
الايدا ءماجىلىس ءتوراعاسى نۇرلان نىعماتۋلين بۇل نورمانى ەش تالقىلاۋسىز زاڭ جوباسىنان الىپ تاستاۋ كەرەكتىگىن ايتتى.
اۆتور: رۋسلان عابباسوۆ
